بالا ديماش قانداي بولدى: ديماش ومىرگە كەلەردە اجەسىنە ايان بەرىلگەن - فوتو
وبلىستىق «اقتوبە» گازەتى بالا ديماشتىڭ قانداي بولعانىن ونىڭ اناسى، تانىمال ءانشى سۆەتلانا ايتبايەۆادان سۇراعان.
ميللياردتاعان قىتايلىقتاردىڭ تاڭدايىن قاقتىرعان جەرلەسىمىزدىڭ قىتاي حالىق رەسپۋبليكاسىنىڭ ورتالىق «Hunan TV» تەلەارناسى ۇيىمداستىرعان بايقاۋدىڭ ءبىرىنشى كەزەڭىندە توپ جارىپ، ۇزدىك كورىنگەنىن بۇعان دەيىن دە حابارلاعان بولاتىنبىز. كوپشىلىك ءالى قاتە ءتۇسىنىپ، ديماشتى بايقاۋدىڭ جەڭىمپازى دەپ تانىپ ءجۇر. ايتقاندارى كەلسىن، جاقسى ءسوز عوي... الايدا ءۇش ايعا سوزىلاتىن بايقاۋ 14 كەزەڭنەن تۇرادى ەكەن. الدىن الا ىرىكتەۋدەن ءوتىپ، بايقاۋدىڭ ءبىرىنشى كەزەڭىنە 8 ءانشى قاتىسىپتى. ونىڭ ەڭ جاسى - ءبىزدىڭ ديماش. ءبىرىنشى كەزەڭدە سۇرىنگەن ءبىر ءانشى بايقاۋدان شىعارىلىپ، 28 -قاڭتاردا وتەتىن كەلەسى كەزەڭگە 7 ءانشى قاتىسادى.
ال ەندى عالامتوردى شۋلاتقان ديماشتىڭ بالا كەزدە قانداي بولعاندىعى تۋرالى اناسى سۆەتلانا ايتبايەۆادان از-كەم سۇراعان ەدىك. ءالقيسسا...
«ەسىمى ايان بەرىپ قويىلدى»
رەسپۋبليكالىق جانە حالىقارالىق بايقاۋلاردىڭ جەڭىمپازى قالىڭ جۇرتقا ديماش قۇدايبەرگەن ەسىمىمەن تانىمال. الايدا، ونىڭ ءتولقۇجاتىنداعى شىن ەسىمى «دىنمۇحاممەد قۇدايبەرگەن» دەپ جازۋلى تۇر.
- ديماشتىڭ ەسىمى ايانمەن قويىلدى. ونىڭ قىسقاشا تاريحى بىلاي: اتامىزدىڭ ستۋدەنتتىك كەزىنەن بەرى سىيلاستىعى ۇزىلمەگەن باقتىعالي ساندىبايەۆ دەگەن دوسى بولدى. سونىڭ توقساننان اسقان اجەسى سول كەزدە ءتۇس كورگەنىن، تۇسىندە دۇنيەگە كەلەتىن بالانىڭ ەسىمىن مۇحاممەد قويىڭدار دەپ ايان بەرىلگەنىن ايتتى. سودان اتا-ەنەم بار، جولداسىم قانات بار، پايعامبار ەسىمىنە ءتىلىمىز ءتيىپ كەتىپ جۇرەر دەگەن ويمەن، ءارى اجەنىڭ دە كوڭىلىن قالدىرماي، ءسال وزگەرتىپ، بالانىڭ ەسىمىن «دىنمۇحاممەد» دەپ قويدى. سودان بەرى دىنمۇحاممەد دەگەن اتى قۇجاتتا عانا جازىلادى، ال ۇيدە، قازىر ءتىپتى ساحنادا دا ديماش بوپ ايتىلىپ ءجۇر. بۇلاي ەركەلەتۋ كورنەكتى قايراتكەر دىنمۇحاممەد قونايەۆتان باستالعان ءۇردىس قوي. ءبىز دە سودان اسپادىق. قازاقستانداعى بارلىق دىنمۇحاممەدتەر - ديماشتار عوي. ول - جازىلماعان زاڭ، - دەيدى ديماشتىڭ اناسى.
اسپاپتىڭ كۇيىن بەس جاسىندا بايقاعان
اتا- اناسى ديماشتى بەس جاسىنان باستاپ اقتوبەدەگى احمەت جۇبانوۆ اتىنداعى مۋزىكا كوللەدجىندەگى بالالار ستۋدياسىنىڭ فورتەپيانو كلاسىنا بەرىپتى.
- ۇيىمىزدە ءبىر پيانينو بولدى. ديماش ۇيدە سونىمەن دايىندالىپ جۇرەتىن. نەگىزى فورتەپيانونىڭ ءبىر جەردەن ەكىنشى جەرگە كوشىرگەندە، قوزعاعاندا، بۇراۋى، ياعني، كۇيى وزگەرىپ كەتىپ جاتادى. ءبىر قيىنى، بۇل اسپاپتىڭ قۇلاق كۇيىن تەك ارنايى ماماندار عانا كەلتىرەدى. ءبىر كۇنى جاڭاعى اسپاپتى ءبىر بولمەدەن ەكىنشى بولمەگە كوشىرگەنىمىزدە كۇيى وزگەرىپ كەتكەن عوي. ونى بىلايعى جۇرت اڭعارا بەرمەيدى، ادەمى دىبىس شىعارىپ تۇرعانعا، سىرت كوزگە ءبارى دۇرىس كورىنەدى. ءبىراق، ەستۋ قابىلەتى جوعارى مۋزىكانتتار اسپاپتىڭ كۇيى كەتىپ تۇرعانىن بىردەن بايقاپ قالادى. كانىگى ماماندار ادەتتە قانداي دا ءبىر اسپاپتىڭ قۇلاق كۇيى ءسال وزگەرسە، بىردەن كەرى اسەر ەتىپ، باس اۋىرتاتىنىن ايتىپ جاتادى. سودان ديماش سول اسپاپپەن ساباعىنا دايىندالىپ ءجۇردى. ءبىر كۇنى ستۋديادا ساباق بەرەتىن مۇعالىمىنە بارىپ، شاعىمدانىپتى: «ۇيدەگى اسپاپتىڭ دىبىسى ماعان تۇك ۇناماي ءجۇر، باسىمدى اۋىرتادى» دەپ. نەبارى بەس- اق جاستا ەكەن. سوندا دا بولسا، دىبىستىڭ ادەتتەگىدەن ءسال وزگەرگەنىن سەزىپ تۇرعانى عوي. مۇعالىمىنەن سول اڭگىمەنى ەستىپ، دەرەۋ اسپاپتىڭ كۇيىن كەلتىرۋشى ماماندى شاقىرتىپ، دۇرىستاپ بەرگەنىمىز بار، - دەيدى سۆەتلانا ايتبايەۆا.
سونداي- اق، بالا ديماش اناسى سۆەتا ساحناعا شىعىپ ءان سالىپ تۇرعاندا، قاسىنا جۇگىرىپ بارىپ، انشىلەردىڭ ورتاسىندا تۇراتىن بولعان. كىشكەنتاي كەزىندە وزگە بالالار ءۇيدىڭ، ءتۇرلى كولىكتىڭ، گۇلدىڭ سۋرەتىن نەمەسە كوميكستەر سالىپ وتىرعاندا، ديماش ۇنەمى اق قاعازعا سىمى شۇباتىلعان ميكروفون، كاسسەتالار، داۋىس ۇلعايتقىش كولونكالاردىڭ، سونداي- اق، مىندەتتى تۇردە ءوزىنىڭ ۇلكەن ساحنادا ءان ايتىپ تۇرعانىن بەينەلەيتىن سۋرەتتەر سالاتىن بولىپتى.
اينۇر ءىلياس قىزى.
