دارىگەرگە الدانباۋ ءۇشىن نە ىستەۋ كەرەك

استانا. قازاقپارات - بۇگىندە قازاقستاندىقتار اراسىندا ناۋقاستاردىڭ قالتاسىن قاعۋدى ۇيرەتكەن دارىگەردىڭ «ەمدەۋ ءتاسىلى» كەڭىنەن تالقىلانۋدا.

وسىعان بايلانىستى قازاقپارات ءتىلشىسى زاڭگەرلەردىڭ كەڭەستەرىن، سونداي-اق تانىمال كوماروۆسكييدىڭ ادىلەتسىز دارىگەرلەردى انىقتاۋ امالدارىن ۇسىنىپ وتىر.

زاڭگەرلەردىڭ كەڭەستەرى:

1. جەكە مەنشىك كلينيكانىڭ كومەگىنە جۇگىنەردىڭ الدىندا مەديتسينالىق قىزمەتتەر تۋرالى كەلىسىمشارتتى راسىمدەپ الىڭىز. ونسىز ءسىزدىڭ ءدال سول مەكەمەدە ەمدەلگەنىڭىزدى دالەلدەۋ قيىن.

2. ەمدەۋدىڭ ادىستەرى مەن جوسپارى جايىندا سىزبەن اقىلداسىپ وتىرۋى ءتيىس. وعان جازباشا رۇقسات تا بەرىلەدى.

3. بارلىق ەسەپ- قيساپ تۇبىرتەكتەرىن ساقتاپ وتىرعانىڭىز ءجون. سوتتا ونى ناقتى دالەل رەتىندە ۇسىنۋعا بولادى.

4. سىزگە تالداۋلاردىڭ ناتيجەسىن كورسەتۋى ءتيىس. سونىڭ كوشىرمەسىن جاساپ العان دۇرىس.

5. مەديتسينالىق كارتانىڭ كوشىرمەسىن دە جاساپ العان ارتىق بولمايدى. سەبەبى داۋ- داماي تۋىنداعان جاعدايدا ونداعى جازبالاردى اۋىستىرىپ تاستاۋى ابدەن مۇمكىن.

6. حالىق اراسىندا «سوتتا ءبىر نارسەنى دالەلدەۋ مۇمكىن ەمەس، سەبەبى ءبارى جەڭ ۇشىنان جالعاسقان» دەگەن تاپتاۋرىن پىكىر بار. بۇل استە ولاي ەمەس. بۇگىندە مەديتسينالىق ءبىلىمى بار زاڭگەرلەر بار.

ولار دارىگەردىڭ قاتەلىگىن دالەلدەپ، وتەماقىنى وندىرە الادى. ال تانىمال دارىگەر ەۆگەني كوماروۆسكيدىڭ ايتۋىنشا، زاڭگەردىڭ كومەگىنە جۇگىنبەي-اق ادىلەتسىز دارىگەردى بىردەن انىقتاۋعا بولادى. «دارىگەر ءبىر نارسەنى ساتىپ، بيوقوسپالاردى قابىلداۋدى ۇسىنسا، ودان اۋلاق ءجۇرىڭىز. ءسىزدى قابىلداۋ كەزىندە ناقتى ءبىر زەرتحاناعا بار دەسە، باسقا ماماننىڭ كومەگىنە جۇگىنگەنىڭىز ءجون.

ءوزى جازىپ بەرگەن دارىلەردى ناقتى ءبىر ءدارىحانادان ال دەسە دە، ونىڭ كومەگىنەن باس تارتقانىڭىز دۇرىس. ەگەر ەكى دارىگەر ەكى بولەك دياگنوز قويسا، وندا ءۇشىنشى دارىگەرگە بارىڭىز. ءبىر نارسەنى ەستە ساقتاعان ءجون، جاقسى دارىگەر سىزگە جاعىنىپ، ءوز ارىپتەستەرىن جاماندامايدى، سەبەبى جۇمىسى ونسىز دا باستان اسىپ جاتادى. اق حالاتتى جان شىنىمەن دە ادال بولسا، ەمدەۋدىڭ باعاسىن تالقىعا سالماي، ناۋقاستى بىردەن كاسساعا جىبەرەدى»، - دەيدى كوماروۆسكي.

ايتا كەتەيىك، جاقىندا الەۋمەتتىك جەلىلەرى ارقىلى تاراعان ءبىر بەينەبايان جۇرتتىڭ جاعاسىن ۇستاتتى. وندا پرەزيديۋمدا وتىرعان باس دارىگەر ناۋقاستاردىڭ قالتاسىن قاعۋدىڭ جولدارىن ۇيرەتىپ وتىر. ارتىنان ول جازبانىڭ وسىدان ەكى جىل بۇرىن الماتىداعى №4 -اۋرۋحانادا جاسالعانى انىقتالدى. ال قول استىنداعى قىزمەتكەرلەرگە ناۋقاستارعا مۇمكىندىگىنشە كوپ تالداۋلاردى تاعايىنداۋعا كەڭەس بەرىپ جاتقان ءانۋار امانوۆ سول كەزدە باسشى بولعان. ودان كەيىن ول №7 -اۋرۋحاناعا قىزمەتكە اۋىسقان. قازىرگى كەزدە بۇل ءىس بويىنشا ارنايى جۇمىس كوميسسياسى قۇرىلىپ، ءانۋار امانوۆ ۋاقىتشا قىزمەتىنەن شەتتەتىلگەن.

اۆتور: ارمان اسقاروۆ