ديماش قۇدايبەرگەن سالىستىرۋعا كەلمەيتىن دارىن يەسى - مينيستر مۇحامەدي ۇلى
بۇل تۋرالى مينيستر Facebook جەلىسىندەگى پاراقشاسىندا جازدى.
«قازىر ءبىز ديماش قۇدايبەرگەنگە وپەرالىق باعدارلاما ازىرلەپ جاتىرمىز، ول سيمفونيالىق وركەستردىڭ سۇيەمەلدەۋىمەن ورىنداۋدى جوسپارلاپ وتىر. ديماشتىڭ بولاشاقتا الەمدىك ساحنالاردا بۇدان دا زور جەتىستىكتەرگە جەتەتىنىنە سەنىمدىمىن، سول كەزدە ءبىز ماقتانىشپەن «ءيا، بۇل ءبىزدىڭ ديماش قۇدايبەرگەن!» دەپ ايتاتىن بولامىز. ول ەرەكشە مۋزىكانت، سالىستىرۋعا كەلمەيتىن دارىن يەسى»، - دەپ جازدى مينيستر.
ەسكە سالايىق، قازاقستاندىق ءانشى ديماش قۇدايبەرگەنوۆ قىتايداعى I Am a Singer مۋزىكالىق بايقاۋىنا قاتىسقاننان كەيىن بۇل ەلدە تانىمال بولدى. كوپتەگەن ب ا ق وتانداسىمىز تۋرالى جازىپ جاتقانى جايلى دا اقپارات تاراعان ەدى.
ديماش قۇدايبەرگەن تەلەشوۋدىڭ ءبىرىنشى كەزەڭىندە SOS d'un terrien en détresse ءانىن فرانسۋز تىلىندە ورىنداپ، جەڭىمپاز اتانعان بولاتىن. ءانشى قاتىسىپ جاتقان كونكۋرستا 14 كەزەڭ بار. كونكۋرس قىتايدىڭ چاڭشا قالاسىندا ءوتىپ جاتىر. كەلەسى كەزەڭنىڭ قورىتىندىسى 28 -قاڭتاردا شىعادى. كەلەسى كەزەڭدە ول رەسەيدىڭ ايگىلى ءانشىسى ۆيتاستىڭ ەڭ كۇردەلى سانالاتىن "وپەرا 2" كومپوزيتسياسىن ورىندايدى. الايدا بۇل تۋرالى حابارلاعان ءانشى ءوزىن ۆيتاسپەن سالىستىرماۋدى سۇراعان بولاتىن. ارينە، ۆيتاس جاقسى ءانشى، ونى قۇرمەتتەيمىن، ءبىراق مەن «ەكىنشى ۆيتاس» ەمەسپىن! مۋزىكادان حابارى بار ماماندار مەنى جاقسى تۇسىنەدى!..»، - دەپ جازعان ەدى ءانشى Instagram جەلىسىندە.
