كارىس ەتنوسىنىڭ ءداستۇرلى انسامبلى قىسقى ۋنيۆەرسياداعا ارنالعان كونسەرت وتكىزدى - قىزىلوردا

كەشتىڭ قوناعى كارىس ەتنوسىنىڭ ءداستۇرلى انسامبلى «نورىم ماچي» بولدى. بۇل تۋرالى قازاقپارات ءتىلشىسى وبلىستىق اسسامبلەياعا سىلتەمە جاساپ حابارلادى.
اتالمىش شارا كورەيا رەسپۋبليكاسى ەلشىلىگىندەگى كورەي مادەنيەتى ورتالىعىنىڭ ۇيىمداستىرۋىمەن جانە «قىزىلوردا وبلىستىق كورەيلەر قاۋىمداستىعى» قوعامدىق بىرلەستىگىنىڭ قولداۋىمەن 2018 -جىلى پحەچحاندە بولاتىن قىسقى وليمپيادالىق ويىندار مەن 29 -قاڭتاردا الماتىدا باستالاتىن بۇكىلالەمدىك قىسقى ۋنيۆەرسيادانىڭ قۇرمەتىنە وتكىزىلدى.
سالتاناتتى كەشتە «قىزىلوردا وبلىستىق كورەيلەر قاۋىمداستىعى» قوعامدىق بىرلەستىگىنىڭ جەتەكشىسى ەلەنا كيم ءسوز سويلەدى. جينالعان قاۋىمنىڭ قۇرمەتىنە سامۋلنور - كونە سوقپا مۋزىكالىق قۇرالدارىندا سيقىرلى اۋەن وينالىپ، پانسوري - حالىقتىق ءانى ورىندالدى.
ايتا كەتەتىنى، كارىس حالقىنىڭ ءداستۇرلى انسامبلى «نورىم ماچي» 1993 -جىلى قۇرىلعان. انسامبل بۇگىنگى كۇنگە دەيىن 170 قالا مەن 50 ەلدە ونەر كورسەتتى.
اۆتور: ەلۋباي اۋەزوۆ