ەلباسى دۇنيەجۇزىندەگى ساياسي ومىردە وتە سيرەك كەزدەسەتىن قادامعا باردى - قاسىم- جومارت توقايەۆ

استانا. قازاقپارات - مەملەكەت باسشىسى دۇنيەجۇزىندەگى ساياسي ومىردە وتە سيرەك كەزدەسەتىن قادامعا بارىپ وتىر.

 بۇل تۋرالى ق ر پارلامەنتى سەناتىنىڭ ءتوراعاسى قاسىم- جومارت توقايەۆ ءمالىم ەتتى، دەپ حابارلايدى قازاقپارات.

«وزدەرىڭىزگە ءمالىم، كەشە ەلباسى نۇرسۇلتان ءابىش ۇلى نازاربايەۆ پرەزيدەنت، ۇكىمەت جانە پارلامەنت اراسىندا وكىلەتتىكتەردى قايتا ءبولۋ ماقساتىندا كونستيتۋتسياعا وزگەرىستەر ەنگىزۋ ماسەلەلەرى بويىنشا قازاقستان ازاماتتارىنا ۇندەۋىن جاريالادى. پرەزيدەنت ءوزىنىڭ ءبىرقاتار وكىلەتتىكتەرىن بيلىكتىڭ اتقارۋشى جانە زاڭ شىعارۋشى تارماقتارىنا بەرۋ باستاماسىن كوتەردى. قىزمەت اتقارىپ جۇرگەن مەملەكەت باسشىسى قۇزىرەتىن بيلىكتىڭ تارماقتارىنا ءوز ەركىمەن بەرۋى دۇنيەجۇزىندەگى ساياسي ومىردە وتە سيرەك كەزدەسىن قۇبىلىس»، - دەپ توقتالدى ق. توقايەۆ سەناتتىڭ جالپى وتىرىسىندا.

ونىڭ پايىمىنشا، كونستيتۋتسياعا ەنگىزىلۋى كوزدەلىپ وتىرعان وزگەرىستەر قازاقستانداعى دەموكراتيالىق ۇدەرىستەردى جەتىلدىرۋ جولىندا، جالپى، مەملەكەتىمىزدىڭ دامۋىندا ماڭىزدى بەتبۇرىس بولاتىنى انىق.

«ءبىزدىڭ ساياسي جۇيەمىز مىقتى پرەزيدەنت، بەدەلدى پارلامەنت، ەسەپتى ۇكىمەت تۇجىرىمداماسىنا نەگىزدەلەتىن بولادى. سەنات دەپۋتاتتارى پرەزيدەنتىمىزدىڭ ۇندەۋىن بەلسەندى تۇردە حالىق اراسىندا كەڭ اۋقىمدا ناسيحاتتايدى دەپ سەنەمىن»، - دەپ ءتۇيدى ءسوزىن سەنات ءتوراعاسى.

اۆتور: رۋسلان عابباسوۆ