ازەربايجان ساياساتتانۋشىلارى استانا پروتسەسىن تالقىلادى
«استانا پروتسەسىندەگى كوپ نارسە ب ا ق نازارىنان تىس قالدى، ءبىزدىڭ ساراپشىلاردىڭ سول تاقىرىپتارعا توقتالعانى ءجون. ماسەلەن، بۇل شارا بولماس بۇرىن، قاۋىپسىزدىك بويىنشا وراسان زور جۇمىستار اتقارىلدى. سوڭعى كەزدەرى الەمنىڭ تۇكپىر- تۇكپىرىندە لاڭكەستىك اكتىلەر بولىپ جاتقاندىقتان، قازاقستاندىق تاراپ قاۋىپسىزدىككە ەرەكشە ءمان بەردى. مۇنداي تاقىرىپتا كەلىسسوزدەر وتكىزۋ - وتە قۇندى»، - دەدى مودەراتور، ساياساتتانۋشى يلگار ۆەليزادە. سونىمەن بىرگە، ول استانا پروتسەسىندە رەسەي، تۇركيا، يران جانە اساد رەجىمى وكىلدەرىنىڭ باستى رولدە بولعانىن اتاپ ءوتتى. ا ق ش پەن ب ۇ ۇ ارنايى وكىلى كەلىسسوزدەرگە قاتىسقانىمەن، باقىلاۋشى رەتىندە ەستە قالدى.
ساياسات تانۋشى فيكرەت سادىحوۆ كەلىسسوزدەردە ديپلوماتيالىق سالتاناتتى، كۇلىمدەۋلەر مەن فورمالدى كەلىسسوز پروتسەستەرى بار حاتتامالىق كەزدەسۋلەردى ەشكىم دە كۇتپەگەنىن باسا ايتتى: «بۇل ءتۇرلى كونفەسسيالار، ەتنيكالىق ازشىلىقتار، ءتۇرلى مۇددەلەر مەن الەمدىك ساياساتتاعى ماڭىزدى تۇلعالار قاتىسقان وتە كۇردەلى، جارىلۋ قاۋپى بار پروتسەسس بولدى». ساياسات تانۋشى ەلحان شاحينوگلۋ سيريادا ەكى سوعىستىڭ ءجۇرىپ جاتقانىن ەسكەرۋ قاجەتتىگىن ايتتى: ءبىرىنشىسى - لاڭكەستەرمەن سوعىس، وعان ۇكىمەتتىك جاساق پەن تۇركيا، يران، رەسەي سىندى سىرتقى ويىنشىلار قاتىسۋدا، ەكىنشىسى - ازاماتتىق سوعىس، وعان استانا پروتسەسىنە كەلگەن كۇشتەردىڭ كوشباسشىلارى قاتىسۋدا.
ونىڭ پايىمىنشا، ازاماتتىق سوعىستى باقىلاۋعا مۇمكىندىك بار جانە استانادا ديالوگتىڭ وتكەنى - جاقسىلىقتىڭ نىشانى. «سيريا ماسەلەسىنە قاتىستى رەسەي، تۇركيا جانە يران ىنتىماقتاستىعىنا كەلەر بولساق، استانادا بىرلەسكەن مالىمدەمەنىڭ جاسالعاندىعىن ۇلكەن تابىس دەپ ەسەپتەۋگە بولادى. ەندى بۇل ءۇش مەملەكەت جاعدايدى قاداعالاپ وتىرادى. كەلىسسوزدەر قورىتىندىسى بويىنشا، سيرياداعى تاتۋلاسۋدى جالعاستىرۋدىڭ ءوزى - ۇلكەن تابىس. جەنەۆادا بۇل پروتسەسس تەرەڭدەي تۇسەدى»، - دەپ تۇيىندەدى ساياساتتانۋشى.
