وڭتۇستىك قازاقستاندا قىز- كەلىنشەكتەر اراسىندا جاتىر موينى ىسىگى دەندەپ بارادى

شىمكەنت. قازاقپارات - وڭتۇستىك قازاقستان وبلىسىندا قىز-كەلىنشەكتەر اراسىندا جاتىر موينى ىسىگى كوپتەپ كەزدەسە باستادى.

بۇگىندە وسى دياگنوزبەن 300 ناۋقاس ارنايى تىركەۋگە الىنعان، دەپ حابارلايدى «قازاقپارات» ح ا ا ءتىلشىسى. ۋاقىتىلى ەم-دوم عانا بۇل كەسەلدىڭ الدىن الاتىنىن ءسوز ەتكەن دارىگەرلەر، وسى ماسەلەگە وراي ارنايى بريفينگ وتكىزدى.

وبلىستىق ونكولوگيالىق ديسپانسەردىڭ ماماندارى جاتىر موينى ىسىگى اسىرەسە جاس قىزداردىڭ بولاشاعى ءۇشىن وتە قاۋىپتى ەكەنىن ەسكەرتۋدە.

«قازىرگى تاڭدا قاتەرلى ىسىك اۋرۋلارى «جاسارىپ» وتىر. بۇرىندارى ول 40-50 جاستاعى ايەلدەردە كەزدەسسە، قازىر 22-25 جاستاعى قىز-كەلىنشەكتەردە انىقتالۋدا. كەز كەلگەن ىسىك بىردەن ۇلعايمايدى. سوندىقتان، اۋرۋدىڭ ءبىرىنشى، ەكىنشى ساتىسىندا 100 پايىز ايىعۋعا بولادى. بۇعان قازىرگى مەديتسينانىڭ پارمەنى جەتەدى»، - دەيدى وبلىستىق ونكولوگيالىق ديسپانسەرى كونسۋلتاتيۆتىك ەمحاناسىنىڭ مەڭگەرۋشىسى بولات داۋرەنوۆ.

بۇگىندە وڭىردە قاتەرلى ىسىكتى قوزدىراتىن پاپيللوما ۆيرۋسىنا قارسى ۆاكتسينا ەگۋ باستالعان. ەكپە 10-45 جاس ارالىعىنداعى قىز- كەلىنشەكتەرگە جاسالادى. سەبەبى، ستاتيستيكاعا سۇيەنسەك، پاپيللوما ۆيرۋسىن جۇقتىرۋدىڭ جوعارعى شەگى كوبىنە 16-20 جاس ارالىعىنداعى نازىك جاندىلارعا تيەسىلى. مامانداردىڭ پىكىرىنشە، ەكپە ەرتە جاستا جاسالسا، ىسىكتىڭ الدىن الۋ مۇمكىندىگى ارتادى.

«جاستاردىڭ جىنىستىق قاتىناسقا ەرتە تۇسۋىنە بايلانىستى ەكپە ەگۋ 11-12 جاستاعى قىزداردان باستالىپ وتىر. ءبىراق، ۆاكتسينالاۋ جاساتقاننان سوڭ دا تەكسەرۋدەن ءوتۋى شارت. سەبەبى، ۆاكتسينا دەنساۋلىقتى 100 پايىز قورعامايدى»، - دەيدى وبلىستىق ونكولوگيالىق ديسپانسەرى گينەكولوگيا ءبولىمىنىڭ مەڭگەرۋشىسى باعدات ورمانوۆ.

ايتا كەتەيىك، ەلىمىزدە جىلىنا 30 مىڭعا جۋىق ناۋقاس قاتەرلى ىسىككە شالدىقسا، ونىڭ 17 مىڭنان استامى باقيلىق بولىپ جاتادى. وسى ماسەلەگە الاڭداۋشىلىق بىلدىرگەن دارىگەرلەر الداعى دەمالىس كۇندەرى وبلىس تۇرعىندارى ءۇشىن ارنايى اشىق ەسىك كۇنىن وتكىزۋدى جوسپارلاۋدا.

اينۇر اقبايەۆا