تاتاردىڭ ساپاسىز سارى مايى قازاقستانعا قايدان كەلدى

استانا. قازاقپارات - بۇگىن استانادا وتكەن باسپا ءسوز ءماسليحاتىندا قاراعاندى قالالىق ازاماتتىق كەڭەستىڭ ءتوراعاسى ەرمەك ءابىلدين ساپاسىز سارى ماي ونىمدەرىن جاريالادى.
None
None

سونىڭ ىشىندە تاتارستاندا وندىرىلگەن ماي دا بار، دەپ حابارلايدى قازاقپارات ءتىلشىسى.

ونىڭ ايتۋىنشا، كەڭەس مۇشەلەرى رەسپۋبليكانىڭ ءبىرقاتار ايماقتارىندا تەكسەرىس وتكىزىپ شىقتى. ال ساراپتاماعا قازاقستاندىق ماماندار عانا ەمەس، رەسەيلىك ماماندار دا اتسالىستى. ماسەلەن، قاراعاندى قالاسىندا ساتىپ الىنعان «ەلشانسكي» ونىمىندە مايدىڭ ۇلەسى 72,5 پايىز ەمەس، 44,3 پايىز بولىپ شىقتى. تۋرا سول سارى ماي ورال مەن قوستانايدا ساتىلعان. ال تاتارستاننىڭ «ۆامين» اتتى سارى مايىنىڭ قۇرامىندا مۇلدەم باسقا مايلار انىقتالدى. وندا ءسۇت مايىنىڭ ۇلەسى تەك 18,2 پايىزدى عانا قۇرادى.

«وسىلايشا، وندىرۋشىلەر تاۋاردىڭ قاپتاماسىنا جالعان اقپاراتتى باسىپ، تۇتىنۋشىلاردىڭ قۇقىقتارىن بۇزادى، حالىقتىڭ دەنساۋلىعىنا ءقاۋىپ توندىرەدى. ال سارى مايدىڭ ساپاسى تومەن بولعاننان كەيىن باعاسىن دا ارزانداتىپ قويادى. قاپتاماداعى اقپاراتقا سەنگەن تۇتىنۋشىلار سونىڭ ءبارىن ساتىپ الا سالادى»، - دەيدى ءابىلدين.

كەڭەس باسشىسىنىڭ سوزىنە قاراعاندا، ولار «ۆامين» ماركاسىنىڭ قازاقستانداعى رەسمي ديستريبيۋتورىن ىزدەپ كورگەن. ءبىراق تابا المادى. ال رەسەيدە اتالعان ماركاعا تيەسىلى زاۋىت بانكروت بولىپ شىقتى. «دەمەك، ول تاۋاردى زاڭسىز تۇردە شىعارىپ جاتىر. قازىرگى كەزدە ءبىز ءتيىستى حاتاردى ازىرلەپ، باس پروكۋراتۋراعا، مەملەكەتتىك كىرىستەر كوميتەتى مەن تۇتىنۋشىلار قۇقىقتارىن قورعاۋ كوميتەتىنە جىبەرۋدى جوسپارلاپ وتىرمىز»، - دەپ اتاپ كورسەتتى كەڭەس باسشىسى.

الايدا ق ر ۇلتتىق ەكونوميكا مينيسترلىگى تۇتىنۋشىلار قۇقىقتارىن قورعاۋ كوميتەتى ءتوراعاسىنىڭ ورىنباسارى نۇرقان ءسادۋاقاسوۆتىڭ ويىنشا، «ۆامين» - نىڭ جاسىرىن تسەxى قازاقستاندا ورنالاسۋى ابدەن مۇمكىن. «ءبىز رەسەيلىك ارىپتەستەرىمىزگە ساۋال جولداعان بولاتىنبىز. ولاردىڭ جاۋابىنا سايكەس، ونداي كاسىپورىن 2013 -جىلدان بەرى جۇمىس ىستەمەيدى. دەمەك، بىرەۋلەر قاپتامانى زاڭسىز قولدانىپ ءجۇر. ونداي جاعداي رەسەيدە دە بولعان. ولار قازاقستاندىق ءبىر كومپانيانىڭ زاڭسىز ءونىمىن انىقتادى. سويتسە، قاپتاما سول جەردە قولدان جاسالىپ، تاۋار زاڭسىز ساتىلعان»، - دەيدى ءسادۋاقاسوۆ.

اۆتور: ارمان اسقاروۆ

سوڭعى جاڭالىقتار