ا ق ش پرەزيدەنتى مەكسيكامەن شەكاراعا الىپ قورعان تۇرعىزا باستادى
وسىلايشا، ترامپ ءوزىنىڭ سايلاۋالدى ۋادەلەرىنىڭ ءبىرىن ورىنداۋعا كىرىستى. پرەزيدەنتتىك كرەسلوعا وتىرعان 5 كۇننىڭ ىشىندە ا ق ش- تىڭ جاڭا پرەزيدەنتى ءوزىنىڭ ساياسي باعدارلاماسىنىڭ تاعى ەكى تارماعىن ىسكە اسىرىپ ۇلگەردى: تىنىق مۇحيتى سەرىكتەستىگى تۋرالى كەلىسىمنىڭ كۇشىن جويۋ جانە Obamacare دەپ اتالاتىن دەنساۋلىق ساقتاۋ رەفورماسىن توقتاتاتىن پروتسەدۋرانى ىسكە قوسۋ.
بۇل تۋرالى russian.rt.com سايتىندا حابارلاندى. امەريكا قۇراما شتاتتارىنىڭ 45- پرەزيدەنتى ەل شەكارالارىندا قاۋىپسىزدىكتى كۇشەيتۋ تۋرالى جارلىققا قول قويدى. قۇجاتتاردا سونداي-اق زاڭسىز ميگرانتتارمەن جانە قىلمىسپەن كۇرەسۋ ءۇشىن مەكسيكامەن شەكارادا قابىرعا تۇرعىزۋ جارلىعى قامتىلعان.
دونالد ترامپ مەكسيكامەن شەكارادا قابىرعا تۇرعىزاتىندىعىن جانە ونى مەكسيكا ەسەبىنەن ىسكە اسىراتىنىن بۇعان دەيىن بىرنەشە مارتە ايتقان بولاتىن. بۇل ونىڭ ساياسي باعدارلاماسىنىڭ باستى جانە ەڭ داۋلى بولىگى بولىپ تابىلادى. ەسكە سالايىق,3145 شاقىرىمعا سوزىلعان اتالمىش ەلمەن شەكارا قۇراما شتاتتاردىڭ ىشكى ساياساتى ءۇشىن دونالد ترامپقا دەيىن وزەكتى پروبلەماعا اينالعان ەدى. 1980-جىلدارعا دەيىن ول مۇلدەم دەرلىك قورعالمادى، بۇل كونترابانداشىلارعا قولايلى بولىپ كەلدى. 1993 -جىلى بيلل كلينتون تۇسىندا ەكى ەل شەكاراسىنا كەدەرگى تۇرعىزىلا باستادى جانە ول 2000 -جىلعا دەيىن جالعاستى. بۇل ۋاقىت ىشىندە كاليفورنيا مەن مەكسيكا شەكاراسىنىڭ بارلىق بويىنا دۋال تۇرعىزىلدى. 2006 -جىلى دجورد بۋش- كىشىنىڭ جارلىعىمەن شەكارا بويىندا تاعى 900 شاقىرىمدىق كەدەرگى تۇرعىزىلدى.
دەگەنمەن، 2 مىڭنان استام اۋماق اشىق كۇيىندە قالدى. بۇگىندە ەكى ەل اراسىنداعى شەكارانى ونداعان مىڭ امەريكالىق شەكاراشى كۇزەتەدى، ءبىراق ۆاشينگتوندا زاڭسىز ميگراتسيا ماسەلەسى وزەكتى كۇيىندە قالىپ وتىر. 1970 -جىلدان باستاپ مەكسيكادان ا ق ش- قا 12 ميلليوننان استام ادام كوشىپ كەلگەن. ونىڭ جارتىسىنان استامى - زاڭسىز.
