ماقسات تۋماليەۆ: بۇدان بىلاي فۋتبولشىلاردىڭ جالاقىسى جاريالانبايدى

استانا. قازاقپارات - «اقتوبە» فۋتبول كلۋبى بۇدان بىلاي ءوز فۋتبولشىلارىنىڭ جالاقىلارىن جاريالامايدى.

بۇل تۋرالى كلۋبتىڭ باس ديرەكتورى ماقسات تۋماليەۆ مالىمدەدى. كلۋبتىڭ رەسمي سايتىنا سۇحبات بەرگەن ماقسات تۋماليەۆ فۋتبولشىلاردىڭ ايلىقتارىن كوپشىلىككە جاريا ەتۋ ارقىلى كوماندانىڭ ءبىرتۇتاستىعى مەن ىنتىماعى جوعالاتىنىن ايتتى.

ەستەرىڭىزگە سالا كەتەيىك، وتكەن ماۋسىمنىڭ سوڭىندا «اقتوبەنىڭ» ەكس-ديرەكتورى دميتري ۆاسيليەۆ كومانداداعى ءبىرقاتار ويىنشىلاردىڭ جالاقىلارىن جاريالاعان بولاتىن. سوعان سايكەس، ەڭ كوپ ايلىق الەكسەي شەتكيننىڭ ەنشىسىندە بولىپتى. ول ايىنا 9 ميلليون تەڭگە الىپ كەلگەن. سامات سماقوۆتىڭ جالاقىسى - 6 ميلليون تەڭگە. ال باس باپكەر يۋري ۋتكۋلبايەۆ 3,5 ميلليون تەڭگە جالاقىنى «قاناعات» تۇتقان. ءبىراق ۆاسيليەۆ ءوزىنىڭ جالاقىسىن كورسەتۋدى «ۇمىتىپ» كەتكەن.

الايدا، كەيىن ونىڭ دا ايلىعى بەلگىلى بولدى. ءاۋ باستا كورسەتىلگەندەي 350 مىڭ ەمەس، ايىنا 4 ميلليون تەڭگە جالاقى الىپ جۇرگەن ول اقىرى اباقتىعا جابىلىپ تىندى. «وتكەن جىلى فۋتبولشىلاردىڭ جالاقىلارىن جاريالادى. ەشكىمنىڭ قولى جوق، ەشقانداي ءمور قويىلماعان جاي عانا قاعاز. كەستەنىڭ ءبىر شەتىندە فاميليالارى، ەكىنشى شەتىندە ساندار. وندا دا بارلىق فۋتبولشىلاردىڭ ايلىقتارى كورسەتىلمەگەن. تاڭداپ قانا العان. ەشكىم دە مۇنداي قۇجاتقا سۇيەنىپ، ء«يا، وسىنداي بولعان» دەپ ايتا المايدى»، - دەگەن ماقسات تۋماليەۆ فۋتبولشىلاردىڭ جالاقىلارىن جاريالاۋعا نەلىكتەن قارسى ەكەندىگىن ايتىپ بەردى.

- ەكىنشىدەن، مەن فۋتبولشىلاردىڭ ايلىقتارىن از ەتىپ كورسەتىپ، ءبىراق جاسىرىن بونۋستارىن ايلىعىنان ەكى، ءتىپتى ءۇش ەسە كوپ قىلىپ قوياتىنداردى جاقتايتىنداردىڭ قاتارىنان ەمەسپىن. «اقتوبە» بيىل ءبىرىنشى رەتتە ويىنشىلارى مەن جانكۇيەرلەرىنىڭ الدىندا ادال بولۋدى كوزدەيدى. ال فۋتبولشىلاردىڭ جالاقىلارىن جاريالاۋدى دۇرىس دەپ ەسەپتەمەيمىن. سونداي-اق تۋمالييەۆ الەم فۋتبولىندا دا مۇنداي نارسەنى ەشكىم قولدامايتىنىن اتاپ ءوتتى.

«مەنىڭ تۇسىنىگىمدە بۇل نارسە ءار فۋتبولشىنىڭ جەكە شارۋاسى. كومانداداعى ويىنشىلاردىڭ جالاقىلارىن جاريالاۋدىڭ سوڭى ۇجىمداعى الاۋىزدىققا، رەنىشكە، قىزعانىشقا اكەلىپ سوقتىرۋى مۇمكىن. فۋتبولشىلار تولىعىمەن فۋتبولعا بەرىلىپ، باسقا نارسەلەردى ويلامايتىنداي بولۋى ءتيىس. پروفەسسيونال بولىپ قالۋى قاجەت. بىلتىر فۋتبولشىلاردىڭ جالاقىلارىن جاريالاعاننان كلۋب ءالى دە زارداپ شەگىپ جاتىر. نارازىلىقتارى مەن رەنىشتەرىن بىلدىرگەندەر كوپ. بيۋدجەت بار، ءبىز سوعان جاۋاپ بەرەمىز. مىنە، كلۋبتىڭ ۇستانىمى وسىنداي بولۋى ءتيىس»، - دەدى ول.

ايتا كەتەيىك، بۇل كۇندەرى «اقتوبە» تۇركيادا وقۋ- جاتتىعۋ جيىنىن وتكىزۋدە. كلۋب قاقپاشى اندرەي سيدەلنيكوۆ، دامير ءداۋىتوۆ، بەرىك ايتبايەۆ، رافكات اسلان، جارتىلاي قورعاۋشىلار باۋىرجان بايتانا، راحىمجان روزىباكييەۆ جانە برازيليالىق لەگيونەرلەر كاسسيانو، ۆيتور جۋنيور، جۋنينومەن كەلىسىمشارتقا وتىردى.

دەرەككوز: استانا فۋتبول فەدەراتسياسى