دوپينگ داۋى: لوزاننا سوتىندا قازاقستان ءوز اۋىر اتلەتتەرىن قالاي قورعاماق
سوت 3-4 ساعاتقا سوزىلادى دەپ كۇتىلۋدە.
ونىڭ قورىتىندىسىندا حالىقارالىق اۋىر اتلەتيكا فەدەراتسياسى قازاقستان زىلتەمىرشىلەرىن سپورتتان شەتتەتۋ جونىندەگى ناقتى شەشىمىن جاريالايدى، دەپ حابارلايدى قازاقپارات. وتىرىسقا قازاقستان تاراپىنان قازاقستان اۋىر اتلەتيكا فەدەراتسياسىنىڭ باس حاتشىسى ومار مۇستافين قاتىسادى. ال قازاقستان مۇددەسىن قورعاۋ ءۇشىن ادۆوكات ءارى رەسمي وكىل رەتىندە تاجىريبەلى شۆەيتساريالىق زاڭگەر كلود راموني بولماق.
«اۋىر اتلەتيكا فەدەراتسياسى ءوز تاراپىنان سوت شەشىمىنىڭ سپورتشىلاردىڭ مانسابىنا كەدەرگى كەلتىرمەۋى ءۇشىن قولدان كەلگەننىڭ بارلىعىن ىستەۋگە تىرىسادى. سەبەبى ءبىز ەڭ بىرىنشىدەن، سپورتشىلاردى شەتتەتۋ جازاسى قولدانىلماۋىنا كۇش سالامىز»، - دەلىنگەن «قازاقپارات» اگەنتتىگىنىڭ رەسمي ساۋالىنا بەرىلگەن قازاقستاننىڭ اۋىر اتلەتيكا فەدەراتسياسىنىڭ جاۋابىندا.
فەدەراتسيا دوپينگكە قارسى جاسالعان شارالارعا وڭ باعا بەرىلەتىندىگىنە ءۇمىتتى. «سپورتتىق اربيتراج سوتى ءبىزدىڭ تاراپىمىزدان دوپينگكە قارسى الدىن الۋ شارالارى تۋرالى باياندايمىز، اتاپ ايتقاندا ءبىز سپورتشىلارمەن ونداعان سەمينارلار مەن جەكە اڭگىمەلەسۋلەر وتكىزدىك. سونىمەن قاتار قازاقستاندىق انتيدوپينگتىك ورتالىقپەن بىرگە ۇلتتىق دەڭگەيدە سپورتشىلاردان جۇزدەگەن سىنامالار الىندى. ونىڭ ۇستىنە ق ر ا ا ف قازاقستاندىق سپورت مەديتسيناسى قاۋىمداستىعىمەن تىعىز قارىم- قاتىناس ورناتقان. اتالمىش بايلانىستاردىڭ نەگىزىندە ءبىز سپورتشىلارعا جاراقاتتار كەزىندە ءدارى- دارمەكتەردى قالاي پايدالانۋ قاجەتتىگىن، اس قوسپالارىن تۇتىنۋ مادەنيەتىن تۇسىندىرەتىن ساباقتار وتكىزۋدەمىز»، - دەلىنگەن حابارلامادا.
باسپا ءسوز قىزمەتىنىڭ حابارلاۋىنشا، بىلتىر ق ر ۇلتتىق چەمپيوناتتارىندا دوپينگتىڭ 4 وقيعاسى عانا تىركەلگەن. حالىقارالىق جارىستاردا بىردە-ءبىر وقيعا تىركەلمەگەن، ونىڭ ءوزى ۇلكەن كورسەتكىش، دەپ سانايدى فەدەراتسيا.
جالپى ەل بويىنشا دوپينگپەن كۇرەس جۇمىستارى قارقىندى جۇرگىزىلۋدە. ەگەر قازاقستان قۇراماسىن سپورتتان ءبىر جىلعا شەتتەتۋ شەشىمى شىعارىلاتىن بولسا، وندا بۇل شەشىم اتلەتتەردىڭ مانسابىنا قاتتى اسەر ەتپەيدى. سپورتشىلار ازيا بىرىنشىلىگى جانە الەم چەمپيوناتى سياقتى جىل سايىنعى تۋرنيرلەرگە قاتىسپاۋى مۇمكىن.
«اعىمداعى جىلدىڭ جارىستارى ليتسەنزيالىق بولىپ تابىلمايدى، سوندىقتان ەگەر قىسقامەرزىمدى شەتتەتۋ بولسا، 2020 -جىلى توكيودا وتەتىن وليمپياداعا جولداما جيناۋ ناۋقانىنا جانە ۇپايلارعا ەش اسەر ەتپەيدى. سونىمەن قاتار، سپورتتان ۋاقىتشا شەتتەتۋ كوماندانىڭ جاتتىعۋى دوعارىلادى جانە ۇلتتىق دەڭگەيدەگى جارىستار وتكىزىلمەيدى دەگەن ءسوز ەمەس»، - دەپ اتاپ ءوتتى فەدەراتسيا.
ەسكە سالا كەتەيىك، 2008 جانە 2012 -جىلعى وليمپيادا سىنامالارىن قايتا اشۋ كەزىندە يليا يليننەن، مايا مانەزادان، سۆەتلانا پودوبەدوۆادان، زۋلفيا چينشانلودان (بارلىعى «التىن»)، يرينا نەكراسوۆادان («كۇمىس»)، ماريا گرابوۆەتسكايادان («قولا») دوپينگ تابىلدى.
حالىقارالىق وليمپيادا كوميتەتى اتالمىش سپورتشىلاردان وليمپيادا جۇلدەلەرىن كەرى قايتاردى. 2016 -جىلى 22 -ماۋسىمدا IWF ۇيىمىنىڭ اتقارۋشى كوميتەتى 2008 جانە 2012 -جىلدارداعى وليمپيادالاردا ءبىر ەلدەن ءۇش سپورتشىدان دوپينگ تابىلسا، ول ەلدىڭ اۋىر اتلەتيكا فەدەراتسيالارى 1 جىلعا سپورتتىق جارىستاردان شەتتەتىلەدى دەگەن قاۋلى قابىلداعان بولاتىن.
اۆتور: جاسۇلان جولدىبايەۆ
