ۋنيۆەرسيادا الاۋى الماتىلىقتارعا سالتاناتتى تۇردە تابىس ەتىلدى - فوتو
استانادا ق ر پرەزيدەنتى نۇرسۇلتان نازاربايەۆتىڭ قاتىسۋىمەن باستالعان الاۋ ەستافەتاسىن الماتىعا قازاقستان قۇراماسىنىڭ كاپيتانى، بياتلونشى داۋلەت راحىمبايەۆ الىپ كەلدى. الاۋ ەستافەتاسىن ۋنيۆەرسيادا ديرەكسياسىنىڭ ديرەكتورى نايل نۋروۆ سالتاناتپەن قابىلداپ الدى. «ماعان الاۋدى الماتىعا جەتكىزۋ امانات ەتىپ تاپسىرىلدى. الاۋدى سىزدەرگە تاپسىرۋ مەن ءۇشىن مارتەبە»، - دەدى داۋلەت راحىمبايەۆ.
ەندى ارنايى شىنى قۇتىدا جەتكىزىلگەن الاۋ اتلەتتەر اۋىلىنداعى الاۋ ساقتاۋ قويماسىندا 29 -قاڭتارعا دەيىن ساقتالادى. بارلىق ايماقتان جەتكىزىلگەن الاۋلار 29 -قاڭتار كۇنى ءال- فارابي اتىنداعى قازاق ۇلتتىق ۋنيۆەرسيتەتىندە ءبىرتۇتاس توستاعاندا تۇتانادى.
الماتىعا الاۋدى جەتكىزگەن مارتەبەلى مەيمانداردىڭ ءبىرى ق ر مادەنيەت جانە سپورت مينيسترىلىگى سپورت كوميتەتىنىڭ ءتوراعاسى ەلسيار قاناعاتوۆ ۋنيۆەرسيادا قاتىسۋشىلارىنا ساتتىلىك تىلەدى.
«قۇرمەتتى سپورت سۇيەر قاۋىم، سىزدەر تاريحي ءساتتىڭ كۋاسى بولىپ وتىرسىزدار. ەلباسىنىڭ قولىنان العان ۋنيۆەرسيادا الاۋى الماتىعا جەتتى. قۇتتى بولسىن. داۋلەت راحىمبايەۆقا جانە قازاقستان قۇراماسىنا جەتىستىككە جەتۋدى تىلەيمىز»، - دەدى ەلسيار قاناعاتوۆ.
ايتا كەتەيىك بۇگىن استانادا باستالعان الاۋ ەستافەتاسىندا ەلباسى ۋنيۆەرسياداعا قاتىساتىن قازاقستان قۇراماسىنىڭ كاپيتانى بياتلونشى داۋلەت راحىمبايەۆقا ەلىمىزدىڭ تۋىن تابىس ەتتى. راحىمبايەۆ قازاقستان قۇراماسى جارىستارعا تولىعىمەن دايىن ەكەندىگىن باياندادى. ەستافەتاعا بارلىعى 1 مىڭعا تارتا الاۋگەر قاتىسپاق. جالپى الاۋ ەستافەتاسى 22500 شاقىرىمدى ەڭسەرەدى دەپ جوسپارلانعان.
اۆتور: الماس مۇقاش ۇلى
