قاپشاعاي كولىنىڭ جاعالاۋى دامي تۇسپەك

تالدىقورعان. قازاقپارات - قاپشاعايدىڭ ەڭ باستى باعىتتارىنىڭ ءبىرى - كولدىڭ جاعالاۋىن دامىتۋ. قالا اكىمى تالعات قايناربەكوۆ وسى ماقساتتا اتقارىلىپ جاتقان جۇمىستاردىڭ بارىسىمەن وبلىس باسشىسىن تانىستىردى،

 دەپ حابارلايدى قازاقپارات الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

 قالا اكىمىنىڭ ايتۋىنشا، جالپى اۋماعى 8,2 گ ا 5- شى جانە 6- جاعاجايلارعا بيىلعى جىلعا 265 ميلليون تەڭگە بولىنگەن. مۇندا جاعالاۋ ۆولەيبولى، فۋتبول جانە بالالاردىڭ ويىن الاڭدارى، قايىققا ارنالعان پيرس، باسقا دا قاجەتتى مۇمكىندىكتەردىڭ ءبارى جاسالماق. وبلىس اكىمى اماندىق باتالوۆ دەمالىس ايماعىنىڭ ەڭ الدىمەن ساپالى جاسالۋىنا، قىزمەت كورسەتۋ قۇنى قاراپايىم تۇرعىندار ءۇشىن قولجەتىمدى بولۋىنا نازار اۋدارۋدى مىندەتتەدى. تۋريزمدى دامىتۋعا زور ىقپال ەتەتىن جاعالاۋدى اباتتاندىرۋ جوباسىن ازىرلەپ، ۇسىنۋدى تاپسىردى. وبلىس باسشىلىعى تاراپىنان بۇل ىسكە بارلىق قاجەتتى كومەك پەن قولداۋ كورسەتىلەتىنىن ايتتى.

سونداي اق اماندىق باتالوۆ قاپشاعاي قالاسىنداعى جۇمىس ساپارى بارىسىندا قالانىڭ 1-شاعىناۋدانىنداعى № 17, 19 ۇيلەردىڭ اۋلالارىندا بولىپ، اۋلا الاڭدارىن جاڭارتۋ جوبالارىمەن تانىستى.

اۋداندىق ت ۇ ك ش ءبولىمىنىڭ باسشىسى قايرات كۇلەنبايەۆتىڭ ايتۋىنشا، جالپى اۋلالاردى اباتتاندىرۋ كەزەڭ- كەزەڭىمەن ىسكە اسىرىلىپ، وعان جالپى سوماسى 687 ميلليون تەڭگە بولىنبەك. وسى قارجىعا قالاداعى 12 اۋلانى كوركەيتۋ جوسپارلانعان. بالالاردىڭ ويىن الاڭدارى، باسكەتبول، فۋتبول الاڭدارى، ورىندىقتار، ۋرنالار، قورشاۋلار، جاياۋ جۇرگىنشى جولى - بارلىق جاعدايلار جاسالاتىن بولادى. وبلىس اكىمى اماندىق باتالوۆ اۋلانى اباتتاندىرۋ بارىسىندا اۋلاداعى بالالاردىڭ ەركىن ويناپ، قاريالاردىڭ دەمالىپ، اڭگىمەلەسىپ وتىرۋلارىنا قولايلى جاعدايلاردىڭ ءبارى ساپالى قاراستىرىلۋى كەرەكتىگىن باسا تاپسىردى.

اۆتور: سامال قابىشيەۆا