قازاقستاندا تىركەلمەگەن تەلەفوندار بۇعاتتالادى
جاڭا نورمالارىنا وتكەن جىلدىڭ 22 -جەلتوقسانىندا قول قويىلعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزم جانە تەرروريزم ماسەلەلەرى بويىنشا وزگەرىستەر ەنگىزۋ تۋرالى» زاڭدا تەلەفونداردىڭ يدەنتيفيكاتسيالىق كودتارىن ءبىرىڭعاي بازاعا تىركەۋدىڭ مىندەتتى ەكەنى كورسەتىلگەن.
قازىر قازاقستاندا IMEI- كودتاردىڭ ءبىرىڭعاي بازاسىن قۇرۋ جۇمىستارى باستالدى. Kcell مەن Beeline باسپا ءسوز قىزمەتىندەگىلەردىڭ ايتۋىنشا، ق ر اقپارات جانە كوممۋنيكاتسيا مينيسترلىگى وسى ماسەلە بويىنشا ۇيالى بايلانىس وپەراتورلارىمەن جيىن وتكىزگەن.
«ۇيالى بايلانىس وپەراتورلارى 2017 -جىلدىڭ قاڭتارىندا ق ر «بايلانىس تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزم جانە تەرروريزم ماسەلەلەرى بويىنشا وزگەرىستەر ەنگىزۋ تۋرالى» زاڭدارىنا قاجەتتى وزگەرتۋلەر ەنگىزىلگەن سوڭ، IMEI- كودتاردىڭ ءبىرىڭعاي بازاسىن قۇرۋعا باعىتتالعان جۇمىستاردى باستادى»، - دەلىنگەن Kcell باسپا ءسوز قىزمەتىندەگىلەردىڭ Tengrinews.kz ءتىلشىسى جولداعان ساۋالىنا بەرگەن جاۋابىندا.
وسى زاڭعا سايكەس، ۇيالى بايلانىس وپەارتورلارى ۋاقىتىندا تىركەلمەگەن ابونەنتتەردى بۇعاتتايدى. ايتا كەتەيىك، بۇل زاڭ 2017 -جىلدىڭ 1 -شىلدەسىنەن باستاپ كۇشىنە ەنەدى.
«IMEI- كودتاردىڭ ءبىرىڭعاي بازاسىن قۇرۋ تۋرالى زاڭنىڭ ەرەجەسى مىنانداي: ابونەنتتەردى تىركەۋ جانە تىركەلمەگەن ابونەنت يەلەرىنە ۇيالى بايلانىس قىزمەتتەرىن قولدانۋعا تىيىم سالۋ. ەندى ۇيالى بايلانىس وپەراتورلارىن تىركەۋ 2017 -جىلدىڭ 1 -شىلدەسىنەن باستالادى»، - دەپ ءتۇسىندىردى Kcell باسپا ءسوز قىزمەتىندەگىلەر.
Kcell, Beeline وكىلدەرى IMEI- كودتاردىڭ ءبىرىڭعاي بازاسىن جاساۋ بويىنشا جۇمىس توبىنا قوسىلدى. سونداي- اق، Kcell وكىلدەرى وسى زاڭ ەنگىزىلگەن سوڭ، مەملەكەتتىك ورگاندارداعى اقپاراتتىق جۇيەمەن قالاي بايلانىستا بولاتىنى جايلى تالقىلاپ جاتقانىن ايتتى.
«ءبىز قازىر ارنايى جۇمىس توبىنىڭ اياسىندا جۇمىس ىستەپ جاتىرمىز. وسى ماسەلە بويىنشا جانە باسقا دا وزەكتى ماسەلەلەرگە قاتىستى ۇسىنىستار دايىنداپ جاتىرمىز. وپەراتورلاردا زاڭنامادا كورسەتىلگەن مىندەتتەر بار. ءبىراق قازىر وپەراتورلاردىڭ وسى جوبانى جۇزەگە اسىرۋ ءۇشىن ناقتى نەمەن اينالىساتىنى بەلگىسىز بولىپ تۇر»، - دەلىنگەن Beeline باسپا ءسوز قىزمەتىندەگىلەردىڭ Tengrinews.kz ءتىلشىسى جولداعان ساۋالىنا بەرگەن جاۋابىندا.
زاڭعا سايكەس، جاقىن ارادا ابونەنتتەردى تىركەۋگە قاتىستى ەرەجەلەر دايىن بولۋى قاجەت. قازاقستاندىقتاردىڭ تەلەفونداردى قالاي تىركەيتىنى ازىرشە بەلگىسىز، سەبەبى بۇل جوبانىڭ جۇمىس ىستەۋ مەحانيزمى ءالى ويلاستىرىلماعان ەكەن. Beeline وكىلدەرىنىڭ ايتۋىنشا، قازىرگى ۋاقىتتا ۇيالى بايلانىس وپەراتورلارى وسى ماسەلە بويىنشا ۇسىنىستارىن دايىنداپ جاتىر.
«قازىر تاراپتار (وپەراتورلار، بيلىكتەگىلەر) وسى ماسەلەنى تالقىلاپ جاتىر. بىرنەشە نۇسقا بار. ءبىراق ەندى بۇل جوبانىڭ بارىنشا وڭاي ءارى جەڭىل جۇزەگە اسىرىلىپ، سونداي- اق، ونىڭ ەشبىر اقاۋسىز جۇمىس ىستەۋى ءۇشىن نە جاساۋ كەرەكتىگى ويلاستىرىلىپ جاتىر»، - دەدى Beeline وكىلدەرى.
سونداي- اق، ۇيالى بايلانىس وپەراتورلارى تەلەفونداردى تىركەۋدىڭ تيىمدىلىگى نەدە ەكەنىن ايتىپ ءوتتى.
«قۇجاتتاماعا سايكەس، IMEI- كودتاردىڭ ءبىرىڭعاي بازاسىن قۇرۋ بىرەۋدىڭ مۇلىگىن ۇرلاۋ دەرەكتەرىنىڭ الدىن الۋعا باعىتتالعان. سونىمەن قاتار، قۇجاتتامادا قىرعىزستان رەسپۋبليكاسىنىڭ ابونەتتەردىڭ يدەنتيفيكاتسيالىق كودتارىن تىركەۋ تۋرالى زاڭناماسىنداعى ەرەجەلەردىڭ جانە حالىقارالىق تاجىريبەلەردىڭ، ياعني، تۇركيا، ءازىربايجان، ۋكراينا ەلدەرىندەگى تاجىريبەنىڭ جاقسى ناتيجە كورسەتكەنى مىسال رەتىندە كەلتىرىلگەن»، - دەپ ءتۇسىندىردى Kcell وكىلدەرى.
«ءبىز مۇنداي بازانى ەنگىزۋدىڭ تيىمدىلىگىنە قاتىستى قانداي دا ءبىر پىكىر بىلدىرە المايمىز. الايدا باسقا ەلدەردەگى تاجىريبەگە قاراساق، ولاردا وسى زاڭناما ارقىلى ۇيالى تەلەفوندار مەن باسقا دا قۇرىلعىلاردى ۇرلاۋ دەرەكتەرى ازايعان»، - دەدى Beeline وكىلدەرى.
