قازاقستانداعى ەڭ قاۋىپسىز قالا انىقتالدى

بۇنى قۇقىقبۇزۋشىلىق تۋرالى ستاتيستيكالىق مالىمەت كورسەتىپ وتىر، دەپ حابارلايدى «قازاقپارات» ح ا ا ءتىلشىسى شىمكەنت قالاسى اكىمدىگىنە سىلتەمە جاساپ.
ستاتيستيكالىق مالىمەتتەرگە سۇيەنسەك، 2016 -جىلى شىمكەنتتە 20892 قىلمىستىق قۇقىقبۇزۋشىلىق تىركەلدى. سالىستىرمالى تۇردە الساق، وسى كەزەڭدە استانا قالاسىندا - 39727، الماتىدا 66913 قىلمىستىق ءىس جاسالعان.
اتالمىش ءىرى قالالارداعى حالىق سانىن ەسكەرسەك، شىم شاھارداعى قىلمىس سانى تومەن دەپ سانالادى. قۇزىرلى ورگانداردىڭ مالىمەتىنشە، بۇگىندە شىمكەنتتە ورىن الاتىن قۇقىقبۇزۋشىلىقتىڭ 60 پايىزى ۇرلىق قىلمىسى بولىپ تابىلادى. وبلىس ورتالىعىندا ۇيالى تەلەفونداردىڭ ۇرلىعى وسى قىلمىس ءتۇرىنىڭ جارتىسىنا جۋىعىن قۇرايدى.
سوڭعى كەزدە ميلليونعا تارتا تۇرعىنى بار قالادا قىلمىس دەڭگەيى زەردەلەنىپ، بۇزاقىلىق ءجيى جاسالاتىن ورىندارعا قويىلعان بەينە باقىلاۋ كامەرالارىنىڭ قاتارى كوبەيدى. ناتيجەسىندە، قالاداعى قىلمىس دەڭگەيى تومەندەپ، ءتۇرلى قىلمىستىق ءىس- ارەكەتتەردىڭ بەتىن اشۋ جوعارىلادى. ماسەلەن، 2015 -جىلمەن سالىستىرعاندا قالا اۋماعىندا قىلمىستىق قۇقىقبۇزۋشىلىق سانى 7,4 پايىزعا، وتە اۋىر قىلمىستار 21,4 پايىزعا ازايدى. سونداي-اق، وتكەن جىلمەن سالىستىرعاندا اسا اۋىر قىلمىستار - 6,1 پايىزعا، ال اۋىر قىلمىستار سانى 26,9 پايىزعا تومەندەگەن.
اينۇر اقبايەۆا