ءۇش اعايىندىنى اتقان قارۋدىڭ يەسى بوستاندىقتا ءجۇر - تۋىستارى

تالدىقورعان. قازاقپارات - تۋىستارىنىڭ پىكىرىنشە بىلتىر قىركۇيەك ايىندا ءدۇيىم جۇرتتىڭ جاعاسىن ۇستاتقان ءۇش اعايىندىنىڭ ءولىمىنىڭ ءالى دە اشىلماعان تۇستارى بار.

بۇل تۋرالى مارقۇمنىڭ تۋىسى ەركىن بەيسەكەي قازاقپارات تىلشىسىنە بەرگەن سۇحباتىندا ءمالىم ەتتى.

ونىڭ سوزىنشە، مارقۇمداردى اتقان قارۋدىڭ يەسى بوستاندىقتا ءجۇر. «مارقۇمداردى اتقان قارۋ جانە ءتىنتۋ بارىسىندا تاعى ءبىر قارۋ پايدا بولعان. وسى قارۋلاردىڭ يەلەرى بوستاندىقتا ءجۇر. وسى ءىس بويىنشا جوعارعى جاقتاعىلارعا ايتارىمىز، اتالعان قارۋ جونىندە تەرگەۋ اياعىنا جەتكەن جوق. سەبەبىنە ءبىز ءالى جەتە الماي وتىرمىز»، - دەيدى ەركىن بەيسەكەي.

سونداي-اق ول قۇزىرلى ورگان وكىلدەرى سوتتالعانداردان مورالدىق جانە ماتەريالدىق شىعىندى ۋاقىت وزدىرماي ءوندىرىپ بەرسە دەپ وتىر. سەبەبى، قازا بولعان مارقۇمداردىڭ ارتىندا 8 بالا جەتىم، جارلارى جەسىر قالدى. ال، ءۇش اعايىندىنى ازاپتاپ ءولتىردى دەپ سوتتالعان تالعات سۇلەيمەنوۆ پەن مۇرات وڭالبايەۆقا جالپى قۇنى 105 ميلليون تەڭگە ماتەريالدىق جانە مورالدىق شىعىندى وتەۋ جونىندە سوت ۇكىمى شىققان بولاتىن.

ايتا كەتۋ كەرەك، ءۇش اعايىندىنىڭ قازاسى تۋىستارى ءۇشىن وتە اۋىر بولدى. مارقۇم جارقىنبەك دولداننىڭ اناسى ۇلىنىڭ قازاسىن كوتەرە الماي، قايتىس بولدى. ەرتەڭ جەتىسى وتەدى. بۇگىن الماتى وبلىستىق سوتىندا ءۇش اعايىندىنى ولتىرگەندەردىڭ اپپەلياتسيالىق شاعىمى قارالدى. سوت القاسى شاعىمدى قاناعاتتاندىرۋسىز قالدىردى. مۇقيات زارىلحان، جارقىنبەك دولدان جانە قادىلبەك ءالىمحاندى ءولتىردى جانە قىلمىس بويىنشا حابارلامادى دەگەن ايىپپەن ءۇش ادام سوتتالعان بولاتىن.

تالعات سۇلەيمەنوۆ ءومىر بويىنا تەمىر تورعا قامالدى. ال مۇرات وڭالبايەۆ 25 جىلعا، باقىت بايقاسىموۆ 4 جىلعا سوتتالعان ەدى. ال، قاراساي اۋداندىق سوتىندا قارالعان قىلمىستىق ءىستىڭ ۇكىمى 29 -قاراشادا شىققان بولاتىن.

اۆتور: سامال قابىشەۆا