الماتى وبلىسىندا ءۇش اعايىندىنى ولتىرگەندەردىڭ قايتالاي بەرگەن شاعىمى قارالدى
سوت القاسى سوتتالعان ءۇش ازاماتتىڭ قورعاۋشىلارى تۇسىرگەن شاعىمدى قاناعاتتاندىرمادى، دەپ حابارلايدى قازاقپارات ح ا ا ءتىلشىسى. 25 جىلعا سوتتالعان مۇرات وڭالبايەۆتىڭ قورعاۋشىسى مەركەبەك ماكەنبايەۆ بەرىلگەن جازانى تىم قاتال دەپ وتىر. ەندى ول جوعارعى سوتقا جۇگىنبەك. ونىڭ سوزىنشە، مۇرات وڭالبايەۆتى تالعات سۇلەيمەنوۆ ساتىپ الىنعان مالىن ءتۇسىرىسىپ، كومەكتەسۋگە شاقىرعان. ناقتى مۇرات ادام ولتىرمەگەن. بارلىق قىلمىستى جاساعان تالعات سۇلەيمەنوۆ.
«ولار ءوزارا ءسوز بايلاسپاعان» دەگەن قورعاۋشى وڭالبايەۆتىڭ جازاسىن جەڭىلدەتۋگە بارىنشا تىرىسپاق نيەتتە. ال، باس كۇدىكتى تالعات سۇلەيمەنوۆ پەن باقىت بايقاسىموۆتىڭ قورعاۋشىلارى سوت القاسى شىعارعان شەشىممەن كەلىسكەن سىڭايلى.
ايتا كەتۋ كەرەك، ءۇش ادامدى ازاپتاپ ءولتىرىپ، بوتەننىڭ مۇلكىن جىمقىرىپ، اۋىر قىلمىس جاسادى دەگەن تالعات سۇلەيمەنوۆ ءومىر بويى باس بوستاندىعىنان ايىرىلعان بولاتىن. باقىت بايقاسىموۆ بولسا، اۋىر قىلمىستى كورە تۇرا حابارلاماعانى ءۇشىن 4 جىلعا سوتتالدى. جابىرلەنۋشى تاراپ سوتتىڭ اپپەلياتسيالىق شاعىمدى وزگەرىسسىز قالدىرعانىنا العىستارىن ءبىلدىردى. ولاردىڭ پىكىرىنشە، جازانى جەڭىلدەتۋ ەمەس، كەرىسىنشە اۋىرلاتۋ قاجەت.
ماسەلەن، تالعات سۇلەيمەنوۆتى اتۋ جازاسىنا كەسىپ، مۇرات وڭالبايەۆتى ءومىر باقي باس بوستاندىعىنان ايىرىپ، ال بايقاسىموۆتى كەمىندە 20 جىلعا سوتتاۋ كەرەك دەپ سانايدى. ال وقيعاعا كەزدەيسوق تاپ بولدىم دەگەن بايقاسىموۆ ەگەر اتالعان قىلمىس جايلى مالىمدەگەندە بالكىم مارقۇمداردىڭ ءبىرى ءتىرى قالار ەدى دەپ وتىر. سوت زالىندا ءسوز العان جابىرلەنۋشىلەردىڭ مۇنداي تالابى قاناعاتتاندىرىلمايتىنى جونىندە سۋديا ءمالىم ەتتى.
سەبەبى، جابىرلەنۋشى تاراپ اپپەلياتسيالىق شاعىم تۇسىرمەگەن. ەندى ولار ءوزارا اقىلداسىپ، سوتتالعانداردىڭ جازاسىن قاتالداتۋ جونىندە شاعىم ءتۇسىرۋى مۇمكىن.
ايتا كەتەلىك، قىركۇيەك ايىندا ءۇش اعايىندى ۇزىناعاشقا مال ساتۋعا (40 ءىرى قارا مال) كەتىپ، ءىز- ءتۇزسىز جوعالىپ، ارتىنشا ولاردىڭ ءولى دەنەلەرى تابىلدى. قازا بولعاندار مۇقيات زارىلحان، جارقىنبەك دولدان جانە قادىلبەك ءالىمحاننىڭ ارتىندا ءۇش وتباسىدان 8 بالا جانە جارلارى قالدى.
اۆتور: سامال قابىشەۆا
