ديماشتىڭ اتا-اناسى بالالارىنىڭ قالاي «قىتايلىق عاجايىپقا» اينالعانىن ايتتى

استانا. قازاقپارات - قازاقستاندىق ءانشى ديماش قۇدايبەرگەنوۆ ەرەكشە تالانتىمەن كۇللى قىتاي جۇرتشىلىعىن تاڭقالدىرۋدا.
None
None

ول "I am a Singer" مۋزىكالىق رەاليتي- شوۋىنىڭ ءبىرىنشى كەزەڭىنىڭ جەڭىمپازى اتاندى.

ءبىرى ونىڭ داۋىسىنا قىزىقسا، ءبىرىن ديماشتىڭ كەلىستى كەلبەتى ءتانتى ەتكەن. وسىلايشا ول از ۋاقىتتا قىتايداعى ەڭ تانىمال ادامعا اينالىپ شىعا كەلدى. ول ءان ايتا باستاعاندا-اق شاپالاقتار اعىنى تولاستامايدى. ال جوباعا قاتىسىپ جاتقانداردىڭ بارلىعى دەرلىك قىتاي ەلىنىڭ ەڭ تانىمال، كەمەلىنە كەلگەن جۇلدىزدارى. الايدا ءبىرىنشى كەزەڭ قورىتىندىسى بويىنشا ولاردىڭ ەشقايسىسى دييماشتىڭ شاڭىنا ىلەسە المادى.

«مەنىڭ قانداي ورىن الاتىنىم ماڭىزدى ەمەس. ءبىراق، مەن قاي جارىسقا بارسام دا ەشقاشان ەكىنشى بولىپ كورمەگەنمىن. ارينە مەن ماقتانبايمىن، ءبىراق ءبىرىنشى كەزەكتە ايتقان ءانىڭ كورەرمەندەرگە ۇناۋى ءتيىس»، - دەيدى ديماش قۇدايبەرگەنوۆ.

 

ديماش اۋەلى «جاس قانات»، سوسىن «مەيكين ازيا»، كەيىن «سلاۆيان بازارى» بايقاۋىندا توپ جاردى. جارىس ءوتىپ جاتقان حۋنان پروۆينتسياسىنا اكەسى قانات تا ەرىپ بارعان. ال اناسى ۇلىنا اقتوبەدەن قولداۋ بىلدىرۋدە.

«بۇل ونىڭ ۇلكەن ەڭبەگى. داۋىسىنىڭ وسىنداي بيىككە جەتىپ، كورەرمەندەردى ءتانتى ەتۋى ءۇشىن ول ۇلكەن جۇمىس ىستەدى. ءتۇرلى تاسىلدەردى قولدانىپ، كۇن- ءتۇن دەمەي ەڭبەكتەندى. ونىڭ وسى سايىسقا قاتىسۋىنىڭ ءوزى ۇلكەن جەڭىس. بىزگە قازاقستاننىڭ تۇكپىر- تۇكپىرىنەن حابارلاسىپ، جانكۇيەر بولىپ جاتىر»، - دەيدى اناسى سۆەتلانا ايتبايەۆا.

قازىرگى تاڭدا ديماش تۋرالى قىتاي بۇقارالىق اقپارات قۇرالدارى جارىسا جازا باستاعان.

«ديماشتىڭ ەرەكشەلىگىنە كەلەتىن بولساق، ول وتە ەڭبەكسۇيگىش. ول وقۋ مەن شىعارماشىلىقتى بايلانىستىرا العان بىرەگەي جان. وعان گۋمانيتارلىق پاندەر كوپ ۇنايتىن. اسىرەسە، ادەبيەتكە، قازاقستان تاريحىنا، دۇنيەجۇزى تاريحىنا قاتتى قىزىعادى»، - دەيدى ۇستازى روزا قۋانىش قىزى.

"I am a Singer" مۋزىكالىق جارىسى 14 كەزەڭنەن تۇرادى. وعان جەتى ورىنداۋشى قاتىسادى. وسىعان دەيىن ديماشتىڭ قىتايدا الەم مويىنداعان انشىلەر سايىسىنا قاتىسىپ جاتقانىن جاريالاعان ەدىك. قىتايلىقتار قازاقستاندىق انشىگە «ءتاڭىر ءوزى نازارىنا العان ءانشى» دەپ باعا بەرگەن. ال جەرلەسىمىز سايىستىڭ العاشقى تۋرىندا جەڭىس تۇعىرىنان كورىندى.

  

سوڭعى جاڭالىقتار