قانداستاردىڭ اتاجۇرتقا ورالۋىنا قاتىستى عىلىمي ەڭبەك جارىققا شىقتى

استانا. قازاقپارات - شەت ەلدەردەگى قانداستارىمىزدىڭ اتاجۇرتقا قونىس اۋدارۋىنا قاتىستى عىلىمي ەڭبەك جارىققا شىقتى.

 ەرتەڭ دۇنيەءجۇزى قازاقتارىنىڭ قاۋىمداستىعىنىڭ ۇيىمداستىرۋمەن الماتىدا «قازاق دياسپوراسى جانە اتامەكەنگە ورالۋ (1991-2012)» اتتى ۇجىمدىق عىلىمي مونوگرافيانىڭ تۇساۋكەسەرى وتەدى. عىلىمي ەڭبەك «سامۇرىق- قازىنا» اكسيونەرلىك قوعامىنىڭ قولداۋىمەن شىعۋدا.

مازمۇنى مەن كولەمى جاعىنان اۋقىمدى - 10 تاراۋ، قاتتى مۇقاباداعى 37 باسپا بەتتەن تۇراتىن - بۇل مونوگرافيا قازاق دياسپوراسى، كوشى- قون ساياساتى، دەموگرافيا جانە دياسپورولوگيا تاريحىنىڭ ماسەلەلەرىنە قىزىعۋشىلىق تانىتقان كوپشىلىككە جالپىلاي ارنالادى. كىتاپ گەوگرافيالىق، پاندىك جانە اتاۋلى كورسەتكىشتەرمەن، قىسقارعان سوزدەر تىزىمىمەن، سونداي- اق ءتۇرلى- ءتۇستى سۋرەتتەرمەن جابدىقتالعان.

قازاقتاردىڭ اتامەكەنگە ورالۋى ەلدەگى قازاق سانىنىڭ سانىنىڭ جانە ءوسىمىنىڭ ارتۋىنا ىقپال ەتتى. اتاجۇرتقا قايتا ورالعان قازاقتار رەسپۋبليكانىڭ قازاق تۇرعىندارىنىڭ 10 پايىزىن قۇرايدى.

قازاق دياسپوراسى دامۋىنىڭ تاريحي تاجىريبەسى مەن ولاردىڭ تاريحي وتاندارىنا قونىس اۋدارۋى قازاقستاندىق قوعامنىڭ مەملەكەتتىڭ جاڭاشا دامۋ قۇرىلىسى كەزەڭىندەگى الەۋمەتتىك ماڭىزدى باسىمدىقتارىنىڭ قۇرامداس بولىگى بولىپ تابىلادى. الەمنىڭ 43 ەلىندە تۇرىپ جاتقان شەتەلدەگى ەتنيكالىق قازاقتاردىڭ جالپى سانى 4-4,5 ميلليون شاماسىندا.

 مونوگرافيا اۆتورلارى قاتارىندا - تاريح عىلىمدارىنىڭ كانديداتى گۇلعازيرا بالتابايەۆا، دۇنيەءجۇزى قازاقتارىنىڭ قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ، تاريح عىلىمدارىنىڭ دوكتورى، پروفەسسور جاراس ەرمەكباي جانە فيلوسوفيا عىلىمدارىنىڭ كانديداتى، دوتسەنت ايتبالا بايماعامبەتوۆالار بار. مونوگرافيانىڭ عىلىمي رەداكتورى اكادەميك، تاريح عىلىمدارىنىڭ دوكتورى، پروفەسسور ساتتار ءماجيتوۆ.