اڭعا شىققان بۇركىتشىنىڭ مۇزدان جاسالعان ءمۇسىنى حالىقارالىق جارىستا جۇلدە الدى

كوكشەتاۋ. قازاقپارات - رەسەيدىڭ كراسنويارسك قالاسىندا جىل سايىن «ءسىبىردىڭ تاڭعاجايىپ مۇزى» اتتى حالىقارالىق فەستيۆال ۇيىمداستىرىلادى.

فەستيۆال كەزىندە مۇسىنشىلەر قار مەن مۇزدان ءارتۇرلى كومپوزيتسيالار جاساپ، شەبەرلىكتەرىن ورتاعا سالادى. اتالمىش ونەر دوداسىنا قازاقستان اتىنان اقمولا وبلىسىنىڭ ماڭدايالدى سۋرەتشىسى، دارىندى ءمۇسىنشى ماناربەك بۇرماعانوۆ ءوزىنىڭ شاكىرتى اسەت احمەتوۆپەن بىرگە قاتىسىپ، قازىلار القاسىنىڭ شەشىمىمەن ارنايى جۇلدەمەن ماراپاتتالدى، دەپ حابارلايدى «قازاقپارات» ح ا ا ءتىلشىسى.

قاتارىنان بەسىنشى جىل وتكىزىلىپ وتىرعان فەستيۆالعا كانادا، پولشا، بەلارۋس، ياكۋتيا مەن تىۆا ەلدەرىنەن، سونداي-اق، رەسەيدىڭ ءبىرقاتار قالالارىنان ايتۋلى مۇسىنشىلەر قاتىستى. بايقاۋدا قاتىسۋشىلار ەكى اتالىم بويىنشا ءوزارا باق سىناستى.

ماسەلەن، ون توپ قاردان ءمۇسىن جاساسا، تاعى دا ون كوماندا مۇزدان ءمۇسىن جاساۋ بويىنشا ءوز ونەرلەرىن ورتاعا سالدى. «مەنىڭ ۇستازىم ماناربەك بۇرماعانوۆ ماعان وسى بايقاۋعا قاتىسۋعا ۇسىنىس بىلدىرگەندە بىردەن كەلىستىم. سەبەبى، مۇنداي ونەر دودالارىنا قاتىسۋ كىمگە بولسىن ۇلكەن مارتەبە. ءبىز «اڭشى» اتتى كومپوزيتسيامىزدا ارعىماققا ءمىنىپ، قولىنا بۇركىت ۇستاپ، جانىنا قۇماي تازى ەرتىپ، قانسوناردا قانجىعاسىن مايلاعان اڭشى بەينەسىن مۇزدان قاشاپ جاسادىق. ونەرىمىزدى تاماشالاعان رەسەيلىكتەر مەن قالا قوناقتارى ريزا بولدى»، - دەدى ا. مىرزاحمەتوۆ اتىنداعى كوكشەتاۋ ۋنيۆەرسيتەتتىڭ وقىتۋشىسى اسەت احمەتوۆ.

اۆتور: اسلان وسپانوۆ