اقتوبەلىكتەر قالا اكىمىنىڭ ەسەبىن ادامدار جۇرەتىن دالىزدە وتىرىپ تىڭدادى

كەيبىرى سىيماي، اكىم ەسەبىن دالىزدە وتىرىپ تىڭدادى، دەپ حابارلايدى «قازاقپارات» ءتىلشىسى. اقتوبە قالاسى، بلاگودار اۋىلدىق وكرۋگىنىڭ اكىمدىگى ورنالاسقان عيمارات ءىشى لىق تولدى. اۋىل تۇرعىندارىمەن قاتار، مەملەكەتتىك، كوممۋنالدىق مەكەمە باسشىلارى، كاسىپكەرلەر، قالالىق ءماسليحات دەپۋتاتتارى تۇگەل جينالىپ، زالدىڭ تەڭ جارتىسىن جاۋاپتى قىزمەتكەرلەر تولتىردى. ال زەينەتتەگى قاريالار اۋىلدىڭ جايىن ايتا كەلگەن.
سەبەبى، ولار سۋ مەن جارىق، جول مەن اۋىل ىشىندەگى ۇيلەرمەن ارالاسىپ كەتكەن بەيىت جايىن قوزعادى. ەشكىمگە سەنبەيتىندەرى قالا اكىمىنە تىكەلەي سۇراق قويدى. «اۋىلداعى مەكتەپ 320 بالاعا ارنالعان. قازىرگى ۋاقىتتا 500 دەن استام وقۋشى ءبىلىم الىپ ءجۇر. بىزگە جاڭا مەكتەپ قاجەت»، - دەدى اۋىل تۇرعىنى وڭداسىن ورىنبايەۆ.
ءبىلىم ورداسىن سۇراعان قىزىلجارلىقتار ءۇشىن جاقسى حابار ايتىلدى. اۋىلعا قاجەتتى مەكتەپتىڭ جوبالىق-سمەتالىق قۇجاتى ازىرلەنىپ جاتىر. مەكتەپ 2018 -جىلى سالىنۋى ءتيىس. ال بەكقۇل بابا اۋىلىنىڭ تۇرعىنى ساعىنعالي تاماليەۆ اۋىل سۋىنىڭ ساپاسىنا كۇمان كەلتىرىپ، تازا تىرشىلىك ءنارىن سۇرادى. سونىمەن قاتار، بۇل اۋىلعا دارىگەرلىك امبۋلاتوريا قاجەت. باسى اۋىرىپ، بالتىرى سىزداعاندار، قاراپايىم مەديتسينالىق تەكسەرۋدەن ءوتۋ ءۇشىن قارعالى اۋىلىنا كەلۋگە ءماجبۇر. ءسويتىپ مىڭ جارىم تۇرعىن دەنساۋلىعىن تەكسەرۋ ءۇشىن 25 شاقىرىم قاشىقتا جاتقان اۋىلدان قاتىنايدى.
«اقتوبە وبلىسىندا مەملەكەتتىك- جەكەمەنشىك سەرىكتەستىك نەگىزىندە مەديتسينالىق قىزمەت كورسەتۋ كەڭ قولدانىلا باستادى. وبلىستىق دەنساۋلىق ساقتاۋ باسقارماسى جەر سۇرادى، ماسەلە شەشىلدى. قازىر 14 كاسىپكەر قارجى سالۋعا دايىن. ال جەرگىلىكتى بيلىك حالىققا مەديتسينالىق قىزمەت كورسەتۋ ءۇشىن تاپسىرىس بەرەدى»، - دەدى ءىلياس يسپانوۆ.
حالىق الدىندا العاش رەت ەسەپ بەرگەن ءىلياس يسپانوۆتىڭ ايتۋىنشا، وتكەن جىلعى الەۋمەتتىك- ەكونوميكالىق كورسەتكىش جوعارى. قازىر كەزەكتە تۇرعان 3 مىڭ ادامدى 10 سوتىق جەر تەلىمىمەن قامتاماسىز ەتۋ ءۇشىن اۋىلدارعا ينجەنەرلىك- كوممۋنيكاتسيا تارتىلىپ جاتىر. ال بيىل بارلىعى 10 مىڭ ادام جەر الادى. سونىمەن قاتار، بيىل 6 مەكتەپتىڭ قۇرىلىسى باستالىپ، 8 ءبىلىم ورداسىنا قاجەتتى جوبالىق- سمەتالىق قۇجات دايىندالىپ جاتىر.
التىناي ساعىندىقوۆا