ساۋد ارابياسى جامبىلدىڭ قويلارىنا قىزىعۋدا

تاراز. قازاقپارات - ساۋدارابيالىق ينۆەستورلار جامبىلدىق كاسىپكەرلەرمەن ىنتىماقتاستىق ورناتۋعا نيەتتى، دەپ حابارلايدى «قازاقپارات» ح ا ا ءتىلشىسى جامبىل وبلىسىنىڭ كاسىپكەرلەر پالاتاسىنا سىلتەمە جاساپ.

«ايماقتىق كاسىپكەرلەر پالاتاسى ۇيىمداستىرعان كەزدەسۋ بارىسىندا وبلىسىمىزعا ساپار شەككەن ارابيالىق «Ihuan Hani» كومپانياسىنىڭ وكىلدەرى، ق ر كونسۋلدىعىنىڭ وكىلدەرى جانە وبلىستىق اۋىل شارۋاشىلىعى باسقارماسى جامبىل وبلىسىنان ءتىرى قويلاردى ەكسپورتتاۋ جونىندە كەلىسىمگە كەلدى. شەتەلدىك ينۆەستورلار ءوڭىردىڭ شارۋا قوجالىقتارىنان ۇلكەن كولەمدە قوي مالىن ساتىپ الۋ مۇمكىندىگىن قاراستىرۋدا»، - دەپ ءتۇسىندىردى جامبىل وبلىسىنىڭ كاسىپكەرلەر پالاتاسىنان.

«Ihuan Hani» كومپانياسىنىڭ باس ديرەكتورى حاني الاكلۋك مىرزا قوي مالىن ەكسپورتتاۋ بويىنشا جەرگىلىكتى بيزنەسمەندەرمەن ۇزاقمەرزىمدى ارىپتەستىك ورناتۋعا دايىن ەكەنىن، سونداي- اق وبلىستىڭ اۋىل شارۋاشىلىعىن دامىتۋعا ينۆەستيتسيا قۇيۋ مۇمكىندىكتەرىن قاراستىرىپ جاتقانىن مالىمدەدى.

«Ihuan Hani» كومپانياسى جامبىل وبلىسىنان مەرينوس، اق قوي جانە قازاقي قويدىڭ جىلىنا 100 مىڭ باسىن ساتىپ الۋعا دايىن. ءبىراق جانۋارلاردىڭ قۇلاقتارىندا تاڭبالارى مەن سىرعالارى بولماۋى شارت، جاستارى 4-6 ايلىق، ال سالماعى 20 كەلىدەن اسپاۋى ءتيىس. ءمالىم ەتىلگەندەي، ساۋد ارابياسىنا سۋدان رەسپۋبليكاسىنان ءار باسى 65 دوللارعا باعالاناتىن قارا قويلار اكەلىنەدى، سونداي-اق اۆستراليا مەن ا ق ش-تان قويلار جەتكىزىلەتىن كورىنەدى. مەككەگە قاجىلىق كەزىندە ساۋد ارابياسى 6 ميلليوننان 12 ميلليونعا دەيىن مال يمپورتتايدى.