قىتاي قىزدارى ديماش قۇدايبەرگەنوۆتى مەيرامحاناعا كىرگىزبەي قويدى

استانا. قازاقپارت - ديماش قۇدايبەرگەنوۆ توقتاعان قىتايداعى قوناق ءۇيدى انشىدەن قولتاڭبا العىسى كەلەتىن فاناتتار تورۋىلداپ ءجۇر. بۇل تۋرالى ديماشتىڭ مەنەدجەرى الپامىس ءشارىموۆ ايتىپ بەردى.

ونىڭ سوزىنە قاراعاندا، ديماش قۇدايبەرگەنوۆ قىتايدا ءوتىپ جاتقان I Am a Singer بايقاۋىنىڭ العاشقى كەزەڭىن جەڭگەننەن كەيىن قىتايلىق مۋزىكا سۇيەر قاۋىمنىڭ جۇرەگىن جاۋلاعان.

«فاناتتار ديماشتان قولتاڭبا الىپ، ەستەلىك سۋرەتكە ءتۇسۋ ءۇشىن ءبىزدىڭ قوناق ءۇيدىڭ قاسىنا جينالىپ جاتىر. كەشە مەيرامحاناعا بارماقشى ەدىك، قىزدار جولىمىزدى بوگەدى. ولار ديماشتى ۆيدەوعا ءتۇسىرىپ جاتتى. بىزگە بۇل جاعداي قىزىق كورىنگەنى راس، دەگەنمەن مۇنى ونەرگە قۇرمەت دەپ تۇسىنەمىز» ، - دەيدى الپامىس ءشارىموۆ.

ونىڭ ايتۋىنشا، قىتايدىڭ ىزدەۋ جۇيەسى ينتەرنەت قولدانۋشىلار ءجيى پايدالاناتىن كىلت سوزدەردى جاريالاعان. بەلگىلى بولعانداي، «قازاقستان» جانە «ديماش» اتتى تەگتەر ەڭ كوپ سۇرالاتىنداردىڭ رەيتينگىنە ەنگەن.

«ديماش ءان سالعانى جازىلعان ۆيدەو ساناۋلى مينۋتتاردا جارتى ميلليون رەت كورىلىپ، مىڭداعان پىكىر جازىلدى. ينتەرنەتتە دەرەۋ فانكلۋب قۇرىلىپ، ونىڭ جاڭا سۋرەتتەرى مەن ۆيدەولارى جاريالانىپ جاتتى. ءبىزدىڭ اككاۋنتقا ديماشتىڭ اتىنا كوپتەگەن جىلى لەبىز كەلىپ ءتۇستى» ، - دەيدى الپامىس ءشارىموۆ.

ءانشىنىڭ رەسمي وكىلى ديماش قۇدايبەرگەنوۆ بايقاۋعا 2016 -جىلدىڭ قىركۇيەگىنەن باستاپ دايىندالعانىن ايتتى.

Informburo.kz اگەنتتىگىنىڭ حابارلاۋىنشا، كاستينگ كەزىندە ءانشى بەس ءان ورىنداپتى، ونىڭ ءبىرى قازاق تىلىندە بولعان. دەگەنمەن كونكۋرس رەجيسسەرلەرى SOS d'un terrien en détresse كومپوزيتسياسىن تاڭداعان ەكەن.

«جۇرت ديماش نەگە قازاق ءانىن ورىندامادى دەپ سۇراپ جاتىر. فرانسۋز تىلىندەگى ءاندى رەجيسسەرلەر تاڭداپ الدى. قازاقستاننىڭ اتىن شىعارۋ ءۇشىن ديماشقا الدىمەن ءوزىن كورسەتۋ كەرەك ەدى. الايدا الداعى ۋاقىتتا قازاق ءانىن شىرقاۋدى جوسپارلاپ وتىرمىز» ، - دەپ تولىقتىردى الپامىس ءشارىموۆ.

ونىڭ ايتۋىنشا، مۋزىكالىق بايقاۋ قىتايدىڭ چانشا قالاسىندا ءوتىپ جاتىر. ۆوكالدىق سايىس 14 كەزەڭنەن تۇرادى. ديماش قۇدايبەرگەنوۆا ەندى 28 - قاڭتاردا ونەر كورسەتەدى. قانداي ءاندى ورىندايتىنى ازىرگە قۇپيا.

 Baq.kz