استانا پروتسەسىنىڭ العاشقى كۇنى ساقتىققا تولى ۇمىتكە جەتەلەيدى

استانا. قازاقپارات - استانا پروتسەسىنىڭ العاشقى كۇنى ساقتىققا تولى ۇمىتكە جەتەلەيدى. مۇنداي پىكىردى قازاقپارات تىلشىسىنە كەلىسسوزدەردى ۇيىمداستىرۋ شارالارىنا قاتىسى بار دەرەككوز ءمالىم ەتتى.

«استاناداعى سيريالىق رەتتەۋ جونىندەگى حالىقارالىق كەزدەسۋدىڭ العاشقى كۇنى پىكىرسايىستى كەلەسى كۇنى جالعاستىرۋ شەشىمىمەن اياقتالدى. سيريا ۇكىمەتى مەن قارۋلى وپپوزيتسيا وكىلدەرىنىڭ العاش رەت ءبىر-بىرىمەن بەتپە-بەت كەلىسسوز الاڭىندا كەزدەسۋىنىڭ، جالپى وتىرىستا ءبىر ۇستەل باسىندا وتىرىپ قانا قويماي، سوعىستى توقتاتۋ رەجىمىن نىعايتۋ جولدارىن تىڭعىلىقتى تالقىلاۋعا دايىن ەكەندىگىن ءبىلدىرۋىنىڭ ءوزىن وڭ باعالاۋعا بولادى»، - دەدى ول. ونىڭ ايتۋىنشا، سيريالىق ۇكىمەت پەن وپپوزيتسيا اراسىنداعى بارلىق ماسەلەلەردى تالقىلاۋ ب ۇ ۇ- نىڭ ارناۋلى ەلشىسىن اراعايىندىققا جۇمىلدىرۋ ارقىلى تىكەلەي كەلىسسوزدەر ەمەس فورماتىندا وتۋدە.

«تولىقتاي العاندا، العاشقى قادام استانادا جاسالدى. ونى ساقتىققا تولى ۇمىتكە جەتەلەيدى دەۋگە دە بولادى. 24 -قاڭتاردا سيريالىق رەتتەۋ جونىندەگى كەزدەسۋدىڭ كەپىلگەر ەلدەرى كەلىسسوزدەردى جانە الەۋەتتى بىرلەسكەن قۇجات توڭىرەگىندەگى جۇمىستى جالعاستىرادى»، - دەدى دەرەككوز.

ايتا كەتەيىك، استانا پروتسەسىنە 7 تاراپتىڭ وكىلى قاتىسۋدا. اتاپ ايتقاندا، سيريانىڭ ۇكىمەتتىك دەلەگاتسياسىن ب ۇ ۇ جانىنداعى وسى ەلدىڭ تۇراقتى وكىلى باسار ال-دجافاري باسقارادى. سيريالىق وپپوزيتسيا دەلەگاتسياسىندا شامامەن 15 وپپوزيتسيالىق توپتىڭ وكىلى بار. رەسەي دەلەگاتسياسىنا ر ف پرەزيدەنتىنىڭ سيريالىق رەتتەۋ ماسەلەلەرى جونىندەگى ارناۋلى وكىلى الەكساندر لاۆرەنتيەۆ باسشىلىق جاساۋدا.

تۇرىك جانە يران دەلەگاتسيالارىنىڭ باسشىلارى اتالعان مەملەكەتتەردىڭ سىرتقى ىستەر مينيسترلەرىنىڭ ورىنباسارلارى - سەدات ونال مەن سادەك حۋسەين جابەري انساري. مۇنان بولەك، سيريالىق داعدارىستى رەتتەۋ پروتسەسىنە ب ۇ ۇ باس حاتشىسىنىڭ سيريا جونىندەگى ارناۋلى وكىلى ستاففان دە ميستۋرا مەن قازاقستانداعى ا ق ش ەلشىسى دجورد كرول دە قاتىسۋدا.
اۆتور: مارلان جيەمباي