قىتايداعى قانداستارىمىز «اق قارداعى اق ماحاببات» قار- مۇز ساياحات مەرەكەسىن وتكىزدى - فوتو

قىتايدىڭ « ءتاڭىر تاۋ» پورتالىنىڭ مالىمەتىنە قاراعاندا، شارانىڭ باستى ماقساتى - «كەلىن ءتۇسىرۋ» جانە «سوعىم سويۋ» سەكىلدى ۇلتىمىزدىڭ اسىل مۇراسىن، سالت- ءداستۇرىن جاڭعىرتىپ، بۇگىنگى ۇرپاققا دارىپتەۋ.
«بۇل شارادا ۇلتىمىزدىڭ اسىل مۇراسىنىڭ بىرەگەيى - كەلىن ءتۇسىرۋ ءداستۇرىن باعزى زاماننىڭ باياندى تىرشىلىگىمەن كەلىستىرە وتىرىپ، جاڭا زامانعى كەلىن ءتۇسىرۋدىڭ اتا داستۇرىمىزدەن ساقتالىپ كەلە جاتقان ادەپ- عۇرپىن دارىپتەۋ ماقسات ەتىلگەن. كەلىندى شىعارۋدىڭ الدىندا اتقا قونعان جىگىتتەر قازاق ءۇيدىڭ كەرەگەسىن ءتۇرىپ تاستاپ، اۋجار، جار- جار ايتسا، كيىز ءۇيدىڭ ىشىندەگى جاس كەلىندەر مەن قىزدار جىر تىلىمەن ادەمىلەپ سىڭسىما ايتىپ، بۇكىل ەلدىڭ كوڭىل- كۇيىن تولقىتتى. اتا- اجە جانە باۋىر تۋىستارىمەن كورىستىرىپ، قوشتاسۋ سالتى اياقتالعاننان كەيىن، جەزدەسى قىزدى قولتىقتاپ، اتقا قوندىردى. ادەمى كيىنگەن قىز- كەلىنشەكتەر، اپالار شاناعا وتىرىپ، قارلى دالادا قىز كوشىمەن جاراسىم تاپتى. كەلىن تۇسكەن جەردە شاشۋ شاشىلىپ، كەلىننىڭ بەتى اشىلدى. بوساعادا جەڭگەلەرى وتپەن مايدى دايارلاپ تۇرىپ، كەلىنگە وتقا ماي سالعىزىپ، ءتۇتىن شىعاردى. مۇنداعى ماقسات ەجەلگى كوشپەندىلەردەن كەلە جاتقان، «بۇل اۋلەتكە كەلىن مايداي ءسىڭىپ، جايلى، يبالى بولسىن» دەگەن تانىمىن بىلدىرسە، وتپەن مايدىڭ قوسىلىپ جانۋىن «ماحابباتتارى وتتاي ىستىق، تۇتىندەرى ءتۇزۋ ۇشسىن» دەگەن ىرىم ەدى» ، - دەپ جازادى « ءتاڭىر تاۋ» سايتىنىڭ ءتىلشىسى باعداۋلەت باتىربەك ۇلى .
شاراي اياسىندا، قازاق حالقىنىڭ قوناق كۇتۋى، سوعىم سويۋ، جىلىكتەۋ جانە قوناقتاردىڭ جاس ەرەكشەلىگىنە، دارەجەسىنە قاراي سىباعا تارتۋ سەكىلدى ادەت- عۇرىپتارى كورسەتىلگەن.
اۆتور: ريزابەك نۇسىپبەك ۇلى