نازاربايەۆ استانا پروتسەسىنە قاتىسۋشىلارعا ۇندەۋ جولدادى

استانا. قازاقپارات - قازاقستان پرەزيدەنتى نۇرسۇلتان نازاربايەۆ ەلوردادا باستالعان سيريا ماسەلەسىن رەتتەۋ جونىندەگى حالىقارالىق كەزدەسۋگە (استانا پروتسەسى) قاتىسۋشىلارعا ۇندەۋ جولدادى.

ۇندەۋدى كەلىسسوزدەر بارىسىندا ق ر سىرتقى ىستەر ءمينيسترى قايرات ءابدىراحمانوۆ وقىپ بەردى، دەپ حابارلايدى قازاقپارات.

«سيريا احۋالىن رەتتەۋ جونىندەگى كەلىسسوزدەر قاتىسۋشىلارىنا سالەم جولدايمىن. سيريادا ورىن العان كۇردەلى احۋال بۇكىل الەمدىك قوعامداستىقتىڭ نازارىن وزىنە اۋدارىپ وتىر. شامامەن 6 جىل بويى جالعاسىپ جاتقان قانتوگىس جانجال ءتۇرلى وركەنيەت پەن مادەنيەت توعىسقان قاسيەتتى ولكەگە قايعى-قاسىرەتتەن باسقا ەشتەڭە اكەلمەگەندىگىن مويىنداۋعا ءماجبۇرمىز. قازاقستان بەيبىتسۇيگىش ەل جانە ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە تاياۋ شىعىس وڭىرىندەگى قاۋىپسىزدىك پەن تۇراقتىلىقتىڭ ورناپ، بەكي تۇسۋىنە مۇددەلىلىك تانىتادى»، - دەپ اتاپ وتكەن ق ر پرەزيدەنتى.

مەملەكەت باسشىسى بۇگىنگى كەزدەسۋ سيرياداعى احۋالدى بەيبىت رەتتەۋگە باعىتتالعان حالىقارالىق قوعامداستىق كۇش- جىگەرىنىڭ جارقىن ۇلگىسى سانالاتىندىعىن باسا ايتىپ ءوتتى. «قازاقستان سيريا احۋالىن شەشۋدىڭ جالعىز دۇرىس جولى ءوزارا سەنىم مەن ءوزارا تۇسىنىستىككە نەگىزدەلگەن كەلىسسوزدەر بولۋى ءتيىس دەپ سانايدى.

ەلىمىزدىڭ بۇگىنگى كەلىسسوزدەردى وتكىزۋ ورنى رەتىندە تاڭداپ الىنۋى دا توسىننان ەمەس. وزدەرىڭىزگە بەلگىلى، 2015 -جىلى استانادا جەكەلەگەن سيريالىق وپپوزيالىق توپتار اراسىنداعى كەلىسسوزدەردىڭ 2 راۋندى ءوتتى. ءبىز سيريالىق بوسقىنداردىڭ بەينەتىن جەڭىلدەتۋ ءۇشىن 700 مىڭ دوللاردان استام قارجى بولدىك، تاياۋدا ازىق- تۇلىك تۇرىندەگى 500 توننا گۋمانيتارلىق جۇك جونەلتتىك. استاناداعى كەزدەسۋ بارلىق مۇددەلى تاراپتاردىڭ ب ۇ ۇ قامقورلىعىنداعى جەنەۆالىق پروتسەسس اياسىندا سيريالىق داعدارىستى وڭتايلى شەشۋدى قامتاماسىز ەتەتىندىگىنە جانە سيرياداعى بەيبىتشىلىك پەن تۇراقتىلىقتى ورناتۋ ىسىنە لايىقتى ۇلەس قوساتىندىعىنا سەنىم بىلدىرەمىن. ناتيجەلى جانە تابىستى كەلىسسوزدەر تىلەيمىن»، - دەدى نازاربايەۆ.

اۆتور: مارلان جيەمباي