نازاربايەۆ: ءبىز سيريا بويىنشا كەلىسسوزدەردىڭ جەمىستى وتكەنىن قالايمىز

استانا. قازاقپارات - نۇرسۇلتان نازاربايەۆ ب ۇ ۇ باس حاتشىسىنىڭ سيريا بويىنشا ارناۋلى ەلشىسى ستاففان دە ميستۋرامەن كەزدەستى.

بۇل تۋرالى اقوردانىڭ باسپا ءسوز قىزمەتى حابارلادى. كەزدەسۋ بارىسىندا تاراپتار سيرياداعى قاقتىعىستى رەتتەۋ جونىندەگى الداعى كەلىسسوزدەر ماسەلەسىن تالقىلادى. مەملەكەت باسشىسى استانانىڭ كەلىسسوزدەر وتكىزۋگە دايىن ەكەنىن ايتىپ، بارلىق قاتىسۋشىلار ءۇشىن جاعداي جاسالعانىن اتاپ ءوتتى.

«مەن رەسەي، تۇركيا جانە يران پرەزيدەنتتەرىنىڭ استانادا كەلىسسوزدەر وتكىزۋ جونىندەگى ۇسىنىسىن قابىل الدىم. ءبىز كەزدەسۋدىڭ جەمىستى وتكەنىن قالايمىز. قازاقستان كەزدەسۋگە قاتىساتىن تاراپتاردىڭ بارىمەن تەڭ ءارى سەنىمدى قارىم- قاتىناستا بولعاندىقتان، كەلىسسوزدەر قالىپتى ءوتۋ ءۇشىن بارلىق جاعداي جاسالادى دەپ ويلايمىن»، - دەدى قازاقستان پرەزيدەنتى. نۇرسۇلتان نازاربايەۆ سيريا ماسەلەسى بۇگىندە تاياۋ شىعىستى عانا ەمەس، بۇكىل الەمدىك قاۋىمداستىقتى الاڭداتىپ وتىرعانىن اتاپ ءوتتى. «تاراپتار دا بولىپ جاتقان وقيعالارعا ءبىز سياقتى الاڭداۋشىلىقپەن قاراپ وتىر دەپ ۇمىتتەنەمىن. ساراپشىلاردىڭ ايتۋىنشا، قاقتىعىس باستالعالى 300 مىڭنان استام ادام قازا تاپقان. وسىنىڭ ءبارى ءبىزدى بۇل ماسەلەنى بەيبىت جولمەن عانا شەشۋگە ۇمىتتەنۋگە جەتەلەيدى»، - دەدى مەملەكەت باسشىسى.

قازاقستان پرەزيدەنتى ب ۇ ۇ- نىڭ ارناۋلى ەلشىسىنە استاناداعى كەزدەسۋ جەنيەۆاداعى بەيبىت كەلىسسوزدەرگە دايىندىق بارىسىنا ەلەۋلى ىقپال ەتەتىنىن ايتتى. ستاففان دە ميستۋرا نۇرسۇلتان نازاربايەۆقا استانادا كەلىسسوزدەر وتكىزۋگە مۇمكىندىك بەرگەنى ءۇشىن ب ۇ ۇ باس حاتشىسى انتونيۋ گۋتتەريشتىڭ اتىنان العىس ءبىلدىردى. «ءسىزدىڭ ەلىڭىز حالىقارالىق ارەناداعى ەڭ كۇردەلى تۇيتكىلدەردى رەتتەۋ ىسىندە زور تاجىريبەسىن كورسەتىپ، ۇلگى بولىپ كەلەدى. قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنە تۇراقتى ەمەس مۇشەلىگى سيريا قاقتىعىسىن شەشۋدەگى قوسىمشا مۇمكىندىك بولىپ سانالادى»، - دەدى ستاففان دە ميستۋرا. كەزدەسۋ قورىتىندىسى بويىنشا تاراپتار قارۋلى قاقتىعىستى ودان ءارى رەتتەۋ شارالارى جونىندە پىكىر الماستى.