انشىلەر اراسىندا «ەل ەركەسى - ەسەنقۇل» اتتى بايقاۋ جاريالاندى
جارىس شارتتارىنا سايكەس، قاتىسۋشى ەسەنقۇل جاقىپبەكوۆتىڭ سوزىنە جازىلعان ءبىر ءاندى جانە ءوز قالاۋى بويىنشا تاعى ءبىر ءان ورىنداۋى كەرەك. بايگەگە تىگىلگەن جۇلدە قورى سالماقتى. باس جۇلدە - 500 مىڭ،1- ورىن - 300, 2- 150, 3- 100 مىڭ تەڭگە. سونداي اق ەسەنقۇل جاقىپبەكوۆتىڭ سوزىنە جازىلعان «جاڭا ءان» نوميناتسياسىنا ارنايى جۇلدە 100 مىڭ تەڭگە تىگىلگەن.
بايقاۋعا قاتىسۋشىلار 20- اقپانعا دەيىن وتىنىشتەرىن قالدىرۋى ءتيىس. دودا 23- اقپان كۇنى وتەدى. ال كەلەسى كۇنى جەڭىمپازداردى ماراپاتتاۋ ءراسىمى، سونىمەن قاتار گالا- كونسەرت ۇيىمداستىرىلادى. قاراساي اۋداندىق مادەنيەت ءۇيىنىڭ ادىسكەرى گاۋھار كوكەبايەۆانىڭ مالىمەتىنشە، جارىسقا قاراساي اۋدانىنىڭ اكىمدىگى ۇيىتقى بولۋدا. دودا تۇڭعىش رەت رەسپۋبليكالىق دەڭگەيدە ۇيىمداستىرىلىپ وتىر. قاتىسۋشىلار حابارلاسىپ، نيەت تانىتۋدا.
قازاقستان جازۋشىلار وداعىنىڭ مۇشەسى، پرەزيدەنت ستيپەندياسىنىڭ لاۋرەاتى، «ەڭبەكتەگى ەرلىگى ءۇشىن» مەدالىنىڭ يەگەرى، تانىمال اقىن ەسەنقۇل جاقىپبەك الپىس جاسقا قاراعان شاعىندا دۇنيەدەن وزدى. ول 1954 -جىلى الماتى وبلىسى جامبىل اۋدانىنداعى بىرلىك اۋىلىندا دۇنيەگە كەلگەن. ايتىس الامانىندا وتىز جىلدان استام ۋاقىت تەر توگىپ، تەليەۆيزيالىق ايتىستىڭ تۇڭعىش جەڭىمپازى اتانعان دارىن يەسى. «ءبىزدىڭ ەلدىڭ جىگىتتەرى» ، «الداي- اۋ» سىندى كوپتەگەن اندەرىن حالىق ءسۇيىپ تىڭدايدى. اقىننىڭ 100 دەن اسا ولەڭىنە ءان جازىلىپ، جيناق بولىپ جارىق كورگەن.
اۆتور: سامال قابىشيەۆا
