ديماش قۇدايبەرگەنوۆتىڭ فرانسۋز تىلىندەگى ءانى قانداي مۇڭلى بولسا، تاريحى دا سونداي مۇڭدى

وسى شىعارمانىڭ ارقاسىندا كەلەسى كەزەڭگە جولداما الدى. قازاقپارات ءتىلشىسى ميلليونداعان تىڭدارماننىڭ جۇرەگىن ەلجىرەتىپ، كوڭىلىنە مەدەۋ بولعان ءاننىڭ تاريحىن ەسكە العاندى ءجون كوردى.
بۇل كومپوزيتسيادا فرانسۋزدىڭ گرەگوري لەمارشال اتتى جاس ءانشىسىنىڭ بۇكىل ءومىرى، مۇڭى مەن زارى، قيال- ارمانى كورىنىس تاپقان. قۇيرىقتى جۇلدىزداي جارق ەتىپ وتكەن ونىڭ ءومىرى مۋكوۆيستسيدوز سياقتى ايىقپاس دەرتكە شالدىققاندار ءۇشىن عانا ەمەس، ون ەكى مۇشەسى ساۋ ادامدار ءۇشىن دە قاجىماس قايرات پەن ەرىك- جىگەردىڭ سيمۆولىنا اينالدى.
1983 -دۇنيەگە كەلگەن گرەگوري لەمارشال ەكى جاسقا كەلگەندە دارىگەرلەر ونىڭ مۋكوۆيستسيدوز اتتى دەرتكە شالدىققانىن انىقتادى. تۇقىم قۋالاۋشىلىق ارقىلى بەرىلەتىن بۇل اۋرۋعا قارسى ەم جوق. «مۋكوۆيستسيدوز» ءسوزى لاتىننىڭ ەكى سوزىنەن تۇرادى: «mucus» - «شىرىش» جانە «viscidus» - «تۇتقىر، قويۋ» . ونداي اۋرۋ كەزىندە ادام اعزاسىنان بولىنگەن شىرىش قويۋ بولىپ، ۇيقى بەزى، باۋىر، ىشەك، تەرى مەن سىلەكەي بەزدەرىنە زاقىم كەلەدى. ال وكپەدە قويۋ قاقىرىق جينالىپ، اۋا بارماي قالادى. سودان قان اينالىمى ناشارلاپ، قابىنۋ پروتسەسستەرى باستالادى. قاتتى جوتەل پايدا بولادى. اۋىراتىن ادام اۋانىڭ جەتىسپەۋشىلىگىنەن قايتىس بولىپ جاتادى. سەبەبى وكپە تەك 25 پايىزعا عانا جۇمىس ىستەيدى.
مىنە، وسىنداي دەرتكە شالدىققان گرەگ تاعدىر تالكەگىنە توتەپ بەرە ءبىلدى. وكپەنىڭ قابىنۋىنا قاراماستان، فۋتبول، باسكەتبول سياقتى سپورت تۇرلەرىمەن اينالىستى. ال 1995 -جىلى اكروباتيكالىق روك- ن- روللدان فرانسيا چەمپيونى اتاندى. سپورتپەن كاسىبي تۇردە اينالىسا المادى. سەبەبى وعان ۇلكەن فيزيولوگيالىق دايىندىق قاجەت بولدى. سودان گرەگوري سپورت كوممەنتاتورى بولامىن دەپ شەشتى. الايدا 1998 -جىلى فرانسيا فۋتبولدان الەم چەمپيونى اتانعاندا اكەسىمەن باستەسىپ، كاراوكەدە ءبىر ءاندى ورىنداۋعا ۋادە بەردى. بۇعان دەيىن ول ءوز بويىنداعى انشىلىك قاسيەتىن بايقامادى، ءتىپتى اتا- اناسىنىڭ اقىلىنا دا قۇلاق اسقان جوق. الايدا كاراوكەدە مۇلدەم بوتەن ادامداردىڭ ونىڭ ونەرىنە ءتانتى بولعانىن كورىپ، تولىعىمەن مۋزىكاعا اۋىسۋعا شەشىم قابىلدايدى.
ءسويتىپ، 2005 -جىلى گرەگوري لەمارشالدىڭ («مەن ءوزىمدى تاپتىم» ) اتتى العاشقى البومى جارىققا شىقتى. اتالعان جيناق بىردەن بۇكىل فرانسياعا تارالىپ كەتتى. ال كەلەسى جىلدىڭ باسىندا گرەگوري ءوز ەلىنىڭ تانىمال NRJ Music Awards بايقاۋىندا «جىل جاڭالىعى» سىيلىعىنا يە بولدى. سودان فرانسيا، بەلگيا مەن شۆەيتسارياداعى گاسترولدەر باستالادى. لارا فابيان، اندرەا بوچەللي، سەلين ديون، پاتريسيا كااس سياقتى ساحنانىڭ مايتالماندارى گرەگوريدىڭ داۋىسىنا، مۇقالماس رۋحىنا ءتانتى بولدى. «گرەگ سوزبەن جەتكىزە الماعان نارسەنى داۋىسپەن، كوزبەن جەتكىزە ءبىلدى» ، - دەيدى تانىمال ءانشى لارا فابيان.
ءيا، گرەگوري لەمارشال ءۇشىن ءاربىر ءاندى ورىنداۋ قانشالىقتى اۋىر بولعانىن تەك ونىڭ اتا- انالارى عانا ءبىلدى. « ۇلىما سوفرولوگيا (ىشكى گارمونيا) سەانستارى اۋاداي قاجەت بولدى. ءالى ەسىمدە، وليمپيادا كونسەرتكە دەيىن ون بەس مينۋت قالعاندا گرەگوريدىڭ داۋىسى شىقپاي قالدى. ءبىز شۇعىل ەتيوپاتيانىڭ مامانى ستەفاندى شاقىرتىپ، كومەك سۇرادىق. سونىڭ ارقاسىندا گرەگوري ءاندى ايتىپ قانا قويماي، ەڭ قيىن مەلوديالاردى ورىنداپ شىقتى. ءيا، وعان وتە اۋىر بولدى، ساحنادا قاتتى قينالدى. كورەرمەن قاۋىم ەشتەڭە بايقاعان دا جوق. ال ساحنانىڭ ارعى جاعىنداعى ءبىزدىڭ دە، وليمپيا ديرەكتورىنىڭ دا جاسى سورعالاپ تۇردى» ، - دەيدى گرەگوريدىڭ اكەسى پەر لەمارشال.
2007 -جىلى گرەگوري دەنساۋلىقتىڭ ناشارلاۋىنا بايلانىستى ءۇزىلىس الاتىنىن مالىمدەدى. سوعان قاراماستان، ەكىنشى البومدى شىعارۋدى جوسپارلايدى، ءتىپتى ەلەن سەگارامەن بىرگە «Vivo per leى» ءانىن ورىندايدى. بۇل ونىڭ سوڭعى ءانى ەدى.. .
ءساۋىردىڭ ەكىنشى جارتىسىندا ونى شۇعىل تۇردە پاريجگە جاقىن اۋرۋحاناعا جاتقىزادى. وعان وكپە اۋىستىرۋدى جوسپارلايدى. الايدا دونور تابىلماي قالادى. 2007 -جىلى ءساۋىردىڭ 30- كۇنى گرەگوري لەمارشال 23 جاسىندا قايتىس بولدى.
تانىمال ءانشى قايتىس بولسا دا، ونىڭ مۇراسى وشكەن جوق. سول جىلى گرەگوري لەمارشال اتىنداعى مۋكوۆيستسيدوزبەن كۇرەس قاۋىمداستىعى قۇرىلىپ، ميلليونداعان قارجى جينالدى. ول قاراجات اۋرۋدى زەرتتەۋ جانە ەمحانالاردى جوندەۋ جۇمىستارىنا جۇمسالدى. سونىڭ ارقاسىندا ەۋروپادا مۋكوۆيستسيدوز دەرتىنەن شالدىققان ادامداردىڭ ءومىرى 40 جاسقا دەيىن ۇلعايدى.
ايتا كەتەيىك، ديماش قۇدايبەرگەنوۆ «SOS d'un terrien en detresse» ءانىن 2015 -جىلى بەلارۋستىڭ ۆيتەبسك قالاسىندا وتكەن «سلاۆيانسكي بازار» بايقاۋىندا ورىنداعان بولاتىن. سول كەزدە ول باس جۇلدەنى جەڭىپ الدى.
2013 - جىلى وسى كومپوزيسيانى قازاقستاندىق ءانشى قايرات تۇنتەكوۆ تە ورىنداپ كورگەن.
اۆتور: ارمان اسقاروۆ