يراندا مۇنايشى- ميللياردەر ءولىم جازاسىنا كەسىلدى

يراننىڭ ەڭ باي ادامدارىنىڭ ءبىرى ەكى ميلليارد ەۋرونى تالان-تاراجعا سالدى دەپ ايىپتالۋدا. بۇل تۋرالى ەلدىڭ جوعارعى سوتىنىڭ وكىلى گولام حوسسەين موحسەني-ەدجەي ءمالىم ەتتى.
قازىرگى ۋاقىتتا وليگارح تەگەرانداعى «ەفين» تۇرمەسىندە وتىر. سوت قاۋلىسىنا سايكەس، ول دارعا اسىلاتىن بولادى، دەپ حابرلايدى IRNA اگەنتتىگى.
ميللياردەر 2013 -جىلدىڭ 30 -جەلتوقسانىندا تۇتقىندالعان بولاتىن. وعان ەلگە مۇنايدان تۇسكەن تابىستىڭ ەكى ميلليارد ەۋروسىن جىمقىردى دەگەن ايىپ تاعىلدى. ءۇش جىلدان كەيىن يران بيلىگى زاندجانيدى قازىنانى تونادى جانە الاياقتىق جاسادى دەپ تانىدى.
باباك زاندجاني بىرىككەن اراب امىرلىگىندە ورنالاسقان يراننىڭ ەڭ ءىرى كونگلومەراتتارىنىڭ ءبىرى Sorinet Group كومپانياسىنىڭ باسقارۋشى ديرەكتورى بولعان. سونداي- اق ول Qeshm Airlines اۆياكومپانياسىن جانە راح احان يراندىق فۋتبول كلۋبىن باسقاردى.
42 جاستاعى بيزنەسمەننىڭ بايلىعى 14 ميلليارد دوللارعا باعالانۋدا.