08:38, 22 - قاڭتار 2017 | GMT +6
اۋەجايدان اسقازانىنا ەسىرتكى سالىپ تاسىعان جولاۋشى ۇستالدى
استانا. قازاقپارات - ساۋد ارابياسىنىڭ ەر-رياد اۋەجايىندا جولاۋشى 1 كەلىگە جۋىق گەروين ەسىرتكىسىن اسقازانىنا سالىپ، ونى الىپ وتپەك بولعان.
الايدا شەكاراشىلار قىلمىسكەردى قۇرىقتادى. بۇل تۋرالى «حابار 24» جەرگىلىكتى «ءال-يحباريا» تەلەارناسىنا سىلتەمە جاساپ حابارلادى.
كەدەن ديرەكتورى سۋلتان ءال-فاحيدتىڭ حابارلاۋىنشا، كەلىپ جەتكەن رەيستىڭ جولاۋشىسى تەكسەرۋ كەزىندە كۇدىك تۋدىرعان.
«ونى جەكە تەكسەرۋدەن وتكىزۋ بارىسىندا اسقازانىنا 110 كاپسۋلا گەروين ەسىرتكىسىن سالىپ العانى بەلگىلى بولدى. قىلمىسكەرگە قاتىستى قاجەتتى شارا قولعا الىندى»، - دەپ مالىمدەدى ديرەكتور.
ازىرگە رەيستىڭ قاي ەلدەن جانە ۇستالعان ادامنىڭ قاي ەل ازاماتى ەكەنى ناقتى ايتىلمايدى. ايتا كەتەيىك، ساۋد ارابياسىندا ەسىرتكى زاتتارىن قولدانعان، ونى ساقتاعان جانە ساۋدالاعان ادامعا ءولىم جازاسى تاعايىندالادى.
