قازاقستاندىق ءانشى ديماش قۇدايبەرگەنوۆ قىتايدا ەرەكشە تانىمال بولا ءتۇستى - فوتو، كەسكىن
قىتايلىق باسىلىمداردىڭ حابارلاۋىنشا، بايقاۋدىڭ ءتۇسىرىلىم جۇمىستارى ءوز مارەسىنە جەتكەن. الايدا جوبانىڭ ءالى ەفيرگە شىقپاعانىنا قاراماستان ديماشتىڭ تانىمالدىلىعى كۇن سايىن ارتىپ كەلە جاتىر. قازاق ءانشىنىڭ ونەرىنە ءتانتى بولعان جەرگىلىكتى تۇرعىندار يتەرنەتتەن ديماشتىڭ بۇعان دەيىن ورىنداعان قىتايلىق تانىمال ءانشى حان حۋننىڭ «تاڭ» اتتى ءانى مەن «دايداي-اۋ» ءانىن جوعارى باعالاعان.
بۇعان دەيىن ديماش جوبانىڭ ءبىرىنشى كەزەڭىندە فرانتسۋزداردىڭ ەڭ قيىن ءانىنىڭ ءبىرى بولىپ تابىلاتىن ايگىلى «SOS d'un terrien en détresse» ءانىن ورىنداعانىن حابارلاعان بولاتىنبىز. ال قىتايلىق سايتتاردىڭ حابارلاۋىنشا، ديماش ەكىنشى كەزەڭدە ورىستىڭ جوعارى داۋىستى ءانشىسى Vitas-تىڭ وپەرا2 ءانىن ءساتتى ورىنداعان.
Vitas ەرەكشە داۋىسىمەن قىتايدى تاڭ قالدىرعان ءانشى. بۇل كۇندە قىتايلىق انسۇيەر قاۋىم ديماشتىڭ رەسەيلىك انشىدەن دە تانىمال بولاتىنىنا سەنىمدى. ال ءانشىنىڭ جاقىندا عانا اشقان Sina Weibo (تۋيتتەردىڭ بالاماسى) الەۋمەتتىك ميكروبلوگىنا جازىلۋشىلاردىڭ سانى 35 مىڭعا جەتكەن. العاشقى ەفيردەن كەيىن ديماشتانۋشىلاردىڭ سانى كۇرت كوبەيۋى مۇمكىن.
جوبانىڭ ءتۇسىرىلىمى بارىسىندا ديماشقا قىتاي ءتىلىنىڭ ايتارلىقتاي قيىندىق كەلتىرگەنى بەلگىلى. ايتسە دە جاس ءانشى بۇل قيىندىقتاردىڭ بارلىعىن ەڭسەرىپ كەلەدى.
العاشقى ەفير 21 -قاڭتار كۇنى حۋنان تەلەارناسىنان كورسەتىلدى.
اۆتور: مۇحتار قاليموللا ۇلى
