الماتىدا تۋعان انا مەن باققان انا بالاعا تالاسىپ جاتىر

استانا. قازاقپارات - مەڭلىبايەۆتار وتباسى تۋا سالا ءتىرى جانعا كەرەگى بولماي قالعان ءسابيدى بوبەكتەر ۇيىنەن اسىراپ العان ەكەن.
None
None

الايدا ەكى جىل وتكەندە اياقاستى اناسى پايدا بولىپتى. پەرزەنت داۋى سوتقا دا جەتكەنىمەن، ونداعىلار دا ءسابيدى كەزىندە تاستاپ كەتكەن ءوز اناسىنا قايتارىپ بەرۋدى ۇيعارىپتى. ال اسىراپ العان بالاسىن ەشكىمگە دە بەرگىسى كەلمەگەن ايەل ەندى نە ىستەرىن بىلمەي، كوپشىلىكتەن كومەك سۇراپ وتىر.

ۇلىن قۇشاقتاعان گۇلجان ونى قاسىنان ءبىر ەلى تاستامايدى. قۇرساق كوتەرە الماي، تاستاندى شاقالاققا مەيىرىمىن توككەن كەلىنشەك ەندى انە-مىنە سول كوز قۋانىشىنان ايىرىلعالى تۇر. ويتكەنى، سوناۋ پەرزەنتحانادا تاستاپ كەتكەن اناسى ارادا ەكى جىل وتكەندە بالانى قايتارىپ الماقشى.

گۇلجان قيلىبايەۆا:

- بۇل مەنىڭ بالام! اسىراندى بالا ەمەس بۇل! بۇل مەن ءوز بالام ءۇشىن كۇرەسەم اياعىنا دەيىن. مەن قانشا رەت سوت ورىنداۋشىلاردان قاشىپ كەتتىم بالانى كوتەرىپ. ولاردىڭ دا ادامگەرشىلىكتەرى جوق ەكەن. زاڭ كۇشىنە ەنسىن! تۇسىنبەيدى! بالامەن قاشىپ ءجۇرمىن قازىر شىنى كەرەك!

سوت تا سول ايەلدى قولداپ، بالا قايتارىلسىن دەپ شەشىپتى. تەك ول ءۇشىن اسىراعان اتا-انانى قۇقىعىنان ايىرۋ كەرەك ەكەن. ول جونىندە سوت وتىرىسى ءتورت اپتادان كەيىن باستالماق. جاتىرىن جارىپ شىقپاسا دا، بالاعا باۋىر باسىپ قالعان اناعا ءتىپتى باسقا بالا اسىراپ الۋدى دا ۇسىنىپتى. الايدا گۇلجان ءوزى اتىن ازان شاقىرىپ قويعان ۇلىنان ايىرىلعىسى جوق.

گۇلجان قيلىبايەۆا:

- ماعان ايتادى باسقا بالانى الا سالسايشى دەيدى؟ قالاي الاسىڭ؟ بۇل ءتىرى ادام عوي؟ قالاي تاستاي سالاسىڭ؟ كۇشىك ەمەس بۇل تاستاي سالاتىن. ءبىر رەت تاستاپ كەتتى، ءبىز تاستاساق بۇل بالا نە بولادى قايتادان؟ بالاپانىمىزدى بىزدەن تارتىپ الماسا ەكەن دەيمىن.

گۇلجاننىڭ ايتۋىنشا، كىشكەنتاي سەيدىلدا تاستاپ كەتكەن شەشەسىن كۇتىپ پەرزەنتحانادا ەكى اي جاتىپتى. ودان قالدى، قامقورشىلىق مەكەمەسىندەگىلەر ايەلگە تاعى دا مۇمكىندىك بەرىپ، ونى 3 اي بوبەكتەر ۇيىندە ەشكىمگە بەرمەگەن ەكەن. ءبىراق كىندىگى ورالىپ، ءارى ميىنا قان كەتىپ تۋىلعان ءسابيدى ىزدەپ سول كۇيى ەشكىم كەلمەگەن.

- مىناۋ كىم؟

- اكە!

- ال مىناۋ كىم؟

- ماما!

اسىراپ العان وتباسىنىڭ ونى ەمدەتپەگەن جەرى جوق. سىرقاتىنان ايىققان سەيدىلدا قازىر اتا-اناسىنىڭ قاسىندا اسىر سالىپ ويناپ ءجۇر.

باقىت مەڭلىبايەۆ:

- ويىمىز «وسى بالانى الىپ قويماسا ەكەن، الىپ قويماسا ەكەن». سوت بولىپ جاتىر، سوتتان سوت، سوتتان سوت. ءار اكە، ءار شەشە قالاي سەزىنەدى ءوزىن مۇنداي جاعدايدا؟

بالانى تۋا سالا كەزىندە تاستاپ كەتكەن شەشەسى قازىر ونىڭ تۇرىپ جاتقان ۇيىنە دەيىن ءبىلىپ العان. كۇنارا وسىندا تۋىستارىمەن كەلىپ، جانجال شىعاراتىن كورىنەدى. سونداي سوڭعى جاعدايلاردىڭ ءبىرى ءتىپتى توبەلەسكە ۇلاسا جازداپتى. سالدارىنان ءسابي شوشىنىپ قالعان. تۋماسا دا بالانى تۋعانىنداي تاربيەلەپ، ەندى ودان ايىرىلعالى جاتقان اتا-اناسى بار ءۇمىتىن ەندى اپەللياتسيالىق سوتقا ارتىپ وتىر.

 

ktk.kz

 

سوڭعى جاڭالىقتار