اتىراۋ وبلىسىنىڭ جاستارى نەسيە الىپ، بيزنەس اشۋعا بەلسەندى

ايماق بويىنشا سوڭعى جەتى جىلدا 2500 دەن استام ادام ءوز ءىسىن باستاسا، ولاردىڭ 789 ى جاستارعا تيەسىلى، دەپ حابارلايدى قازاقپارات.
وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەركىن شپانوۆتىڭ ايتۋىنشا، كوپتەگەن جاستار ومىرلىك ۇلكەن تاجىريبەلەرى بولماسا دا، كاسىپتەرىنىڭ ارقاسىندا ءوز جاعدايلارىن جاقسارتۋمەن قاتار، قوسىمشا جۇمىس ورىندارىن قۇرىپ، ەلگە قىزمەت ەتۋدە.
سوڭعى جىلدارى كاسىپ اشامىن دەۋشىلەرگە بەرىلەتىن نەسيە تۇرلەرى مەن كولەمدەرى دە ارتىپ وتىر. بۇرىن نەسيەلەر كوبىنە مال، ەگىن شارۋاشىلىعىنا الىنسا، قازىر ازاماتتار پوليگرافيالىق جۇمىستارعا، جاڭا ۇردىستەگى كيىم تۇرلەرىن شىعارۋعا، شاعىن وقۋ ورتالىعىن اشۋعا جانە جىلىجايدا جاڭا وسىمدەردى شىعارۋ باعىتتارىنا الۋدا.
«اتىراۋ قالاسىنىڭ تۇرعىنى ميرجان ەريمانوۆ العاشىندا جولاۋشىلاردى تاسىمالداۋ ماقساتىندا 3 ميلليون تەڭگە تۇراتىن گازەل اۆتوكولىگىن نەسيەگە ساتىپ الىپ، حالىققا قىزمەت كورسەتكەن. ەكىنشى رەت، 5 ميلليون تەڭگەگە اۆتوبۋستى نەسيەگە الىپ، قالا سىرتىنداعى ەلدى مەكەندەر اراسىندا جولاۋشىلار تاسىمالىمەن اينالىسىپ وتىر. سونداي- اق قۇرمانعازى اۋدانىنىڭ كۋدرياشوۆ وكرۋگىنىڭ 23 جاستاعى تۇرعىنى اقمارال قوشانوۆا مەملەكەتتىك باعدارلاما ارقىلى 600 مىڭ تەڭگەگە نەسيە الىپ، كومپيۋتەرلىك ورتالىعىن اشسا، عاليا سۇلتانوۆا ەسىمدى يندەر اۋدانىنىڭ تۇرعىنى تىگىن شەبەرحاناسىن اشىپ، قىز جاساۋلارىن، كيىم ۇلگىلەرىن تىگۋ ارقىلى ءۇش ادامدى جۇمىسپەن قامتىپ وتىر. اتىراۋدا كاسىپ اشۋشىلارعا قولداۋ جەتكىلىكتى»، - دەيدى ەركىن شپانوۆ.
ەردوس قاسىم