ريو وليمپياداسىنىڭ چەمپيوندارى بالاندين مەن راحيموۆ اسكەري انت قابىلدادى - فوتو

انت قابىلداۋ سالتاناتتى شاراسىندا اسكەري ءبولىمنىڭ جاۋىنگەرلىك تۋى شىعارىلدى. سپورتشىلاردى قۇتتىقتاۋعا ۇلتتىق ۇلاننىڭ «وڭتۇستىك» وڭىرلىك قولباسشىلىعى قولباسشىسىنىڭ مىندەتىن اتقارۋشى گەنەرال- مايور اندرەي كاسكەلەنوۆ كەلدى.
«قۇرمەتتى سپورتشىلار، بۇگىن سىزدەر وتان الدىندا سالتاناتتى تۇردە اسكەري انت قابىلداپ، ۇلتتىق ۇلان قاتارىنا كىرىپ وتىرسىزدار. ەلىمىزدىڭ ەگەمەندىگى مەن تاۋەلسىزدىگىن قورعاۋ جولىندا ۇلتتىق ۇلان ساربازدارى قاشان دا ءوز الدىنا قويىلعان مىندەتتەردى ابىرويمەن اتقارىپ كەلەدى. سىزدەر دە وزدەرىڭىزگە ارتىلعان مىندەتتەردى قايسارلىقپەن ورىنداپ، بۇگىنگى قابىلداعان انتتارىڭىزعا ادال بولادى دەگەن سەنىمدەمىن!» - دەدى ول.
اسكەري انت قابىلداعان دميتري بالاندين ەرەكشە كوڭىل كۇيگە بولەنگەنىن ايتىپ، اعىنان جارىلدى.
«ۇلاندىق جاۋىنگەر اتانعانىما شىن جۇرەكتەن قۋانىشتىمىن. بۇرىن-سوڭدى قولىما قارۋ ۇستاپ كورمەگەندىكتەن اسكەري انت قابىلداۋ ساتىندە ءسال قوبالجىدىم. ءبىراق وتان الدىندا وزگە دە ساربازدار سەكىلدى اسكەري كيىم كيىپ انت قابىلداۋ ءساتى ماعان ەرەكشە اسەر ەتتى. وزىمە ارتىلعان مىندەتتەردى ابىرويمەن ورىنداپ، ەلىمىزدىڭ، ۇلتتىق ۇلاننىڭ نامىسىن قاشان دا بيىك ۇستاۋعا تىرىسامىن. انتىما ادال بولامىن، قازاقستان رەسپۋبليكاسىنا قىزمەت ەتەمىن!» - دەدى وليمپيادا چەمپيونى.
اۆتور: الماس مۇقاش ۇلى