قازاقستاننىڭ باس بانكى ق ر ۇلتتىق بانكى قانشا التىن الدى

استانا. قازاقپارات - ق ر ۇلتتىق بانكى باعالى مەتالل قورىن تولتىرۋ ءۇشىن تازارتىلعان التىندى قانشا كولەمدە العانىن جاريا ەتتى، دەپ حابارلايدى قازاقپارات.

«باعالى مەتالدار اكتيۆتەرىن تولتىرۋ ءۇشىن تازارتىلعان التىندى الۋعا مەملەكەتتىڭ باسىمدىقتى قۇقىعىن ىسكە اسىرۋ اياسىندا ۇلتتىق بانكى 2014 -جىلى 827 مىڭ ترويا ۋنسياسى مولشەرىندە (25,7 توننا) جانە 2015 -جىلى 962 مىڭ ترويا ۋنسياسى كولەمىندە (29,9 توننا) التىن ساتىپ الدى»، - دەپ حابارلادى ۇ ب باسپا ءسوز قىزمەتى قازاقپاراتتىڭ رەسمي ساۋالىنا.

ال 2016 -جىلى جيناقتالعان تازا التىننىڭ كولەمىن ۇلتتىق بانك الداعى ۋاقىتتا جاريالاماق، سەبەبى قازىرگى كەزدە ءتيىستى ەسەپتەۋ شارالارى ءجۇرىپ جاتىر.

«ۇلتتىق بانك التىندى ءوندىرۋ مەن وڭدەتۋدى تومەندەتۋ نەمەسە ارتتىرۋ شارالارىن رەتتەمەيدى. بۇل ماسەلە باعالى مەتالداردى وندىرەتىن سۋبەكتىلەردىڭ جەكە جاعدايلارىنا بايلانىستى»، - دەيدى ۇ ب وكىلدەرى.