قاشاعان مۇنايى ءۇش باعىت بويىنشا ەكسپورتقا جىبەرىلەدى

اتىراۋ. قازاقپارات - اتىراۋ وبىسىنداعى قاشاعان تەڭىز كەن ورنىنان الىنعان مۇناي ەكسپورتقا ءۇش قۇبىر جەلىسى ارقىلى تاسىمالداناتىن بولادى، دەپ حابارلايدى «قازاقپارات» حاا ءتىلشىسى.

«ءاربىر مەردىگەر كومپانيا - جوبانىڭ اكسيونەرى، باعىت مارشرۋتى مەن ساتۋ ورنىن ءوزى تاڭدايدى. ازىرگە قاشاعان مۇنايى كاسپيي قۇبىر كونسورتسيۋمى جانە «قازترانسويل» ارقىلى تاسىمالدانۋدا. مۇناي وندىرۋدەگى قازاقستان رەسپۋبليكاسىنىڭ ۇلەسى كاسپي قۇبىر كونسورتسيۋمى جۇيەسى بويىنشا تاسىمالدانۋدا. مۇناي ەكسپورتىنىڭ الەۋەتتى باعدارلارى باتىسقا قاراي «اتىراۋ - نوۆوروسسييسك» (ك ق ك ارقىلى) قۇبىر جەلىسىمەن، سولتۇستىك باعىتقا «اتىراۋ - سامارا» ( «ترانسنەفت» رەسەيلىك جۇيەسىنە ەنۋ ارقىلى) قۇبىر جەلىسى جانە شىعىسقا قاراي «اتىراۋ - الاشانكوۋ» قۇبىر جەلىسى ارقىلى جىبەرىلەدى. «ءار اكسيونەر ءوز ۇلەستەرىنىڭ تاسىمالدانۋىنا جانە ەسەپ بەرۋ، ءونىمدى ءبولىسۋ تۋرالى كەلىسىمگە سايكەس ق ر ۇكىمەتىمەن ءونىمدى بولىسۋگە دەربەس جاۋاپ بەرەدى»، - دەپ حابارلادى ق ر ەنەرگەتيكا مينيسترلىگى.

قاشاعان كەن ورنىنان مۇناي ءوندىرۋ ءىسى 2016 -جىلدىڭ قىركۇيەك ايىندا قايتا جانداندى. 2017 -جىلدىڭ 13 -قاڭتارى كۇنى كاسپيي تەڭىزىنىڭ قازاقستاندىق بولىگىندە مۇناي مەن گاز ءوندىرۋ بويىنشا العاشقى جوبانىڭ وپەراتورى نورت كاسپيان وپەرەيتينگ كومپاني ن. ۆ. جاريالاعانداي، 8 -قاڭتار كۇنى قاشاعان كەنىندە ءقاۋىپسىز ءوندىرىس پەن ەكسپورت كولەمى 1 ميلليون شيكى مۇناي جانە كوندەنساتتى قۇرادى. كەن ءوندىرۋ 2016 -جىلدىڭ قىركۇيەك ايىندا باستالىپ، قازىرگى تاڭدا ونىڭ قارقىنى تاۋلىگىنە 180000 باررەل مۇنايعا جەتتى. ىلەسپە گازدى (كۇكىرت) قايتا ايداۋ مەن وڭتايلاندىرۋدى باستاعاننان كەيىن العاشقى قاشاعاندىق جوبانىڭ كەزەڭى اياسىندا ءوندىرىس دەڭگەيىن تاۋلىگىنە 370000 باررەلگە جەتكىزۋ جوسپارلانعان.