اقتوبەدە پروكۋرورلار مەن باسقا دا باسشىلار زيراتتان ورىن سۇراپ، اۋىل اكىمىنىڭ مازاسىن العان

اۋىل اكىمى سوڭعى ۋاقىتتا قورىمنان ورىن سۇرايتىندار كوپ بولىپ كەتكەنىن ايتىپ، ءتىپتى پروكۋراتۋرا مەن باسقا دا قىزمەتتەگى ادامدار تەلەفون شالىپ، مازاسىن الاتىنىنا اشىنادى، دەپ حابارلايدى قازاقپارات ءتىلشىسى.
اقتوبە قالاسى، بلاگودار اۋىلدىق وكرۋگىنىڭ اكىمى باقۇزاق ءداريننىڭ ايتۋىنشا، اۋىلدىڭ ماڭى بۇگىن زيراتقا تولىپ كەتتى. قازىر بۇل وكرۋگتە 18 بەيىت بار.
«كۇنى- ءتۇنى تەلەفونىم ءبىر تىنعان ەمەس. ءتىپتى، پروكۋرورلار دا قوڭىراۋ شالىپ، زيراتتان تۋىسى مەن تانىسىنا ورىن سۇرايدى»، - دەگەن اكىم مەزگىلسىز قوڭىراۋدان مەزى بولعانىن العا تارتادى.
وسىدان قۇتىلۋ ءۇشىن اۋىل باسشىسى زيراتتى زاڭداستىرۋدى قولعا الماق كورىنەدى. بۇل جۇمىستارعا جەرگىلىكتى بيۋدجەتتەن 5,5 ميلليون تەڭگە ءبولىنىپ قويعان.
«قورىمدى زاڭداستىرۋ جۇمىسى باستالدى. ەندى 18 زيراتتىڭ تەحنيكالىق ءتولقۇجاتى بولادى. حالىققا قىزمەت كورسەتۋ ورتالىعى ارقىلى تىركەپ، كەيىن زيراتتى قورشاۋ جۇمىسىن باستايمىز. ويتكەنى، اۋىل ماڭىنداعى بەيىت تولىپ تۇر. كەيبىرى، جەرگىلىكتى ەلدى مەكەننىڭ جەرى ەمەس، جەكەنىڭ يەلىگى. شارۋا قوجالىعىنا راحمەت ايتامىز، ولار تۇسىنىستىكپەن قاراپ، جەرلەۋ راسىمىنە تىيىم سالىپ جاتقان جوق. شىندىعىن ايتقاندا، ول جەر زاڭ بويىنشا ۇكىمەتتىڭ ەمەس، جەكەنىڭ جەرى»، - دەدى وكرۋگ اكىمى باقۇزاق دارين.
ايتا كەتەيىك، زيراتتى زاڭداستىرۋ جۇمىسىنا قارجى وتكەن جىلدىڭ سوڭىندا بولىنگەن.
التىناي ساعىندىقوۆا