استانا- زاشيتا باعىتىمەن قاتىنايتىن جۇردەك پويىزىنا «اباي جولى» اتاۋى بەرىلدى

استانا. قازاقپارات - «استانا- زاشيتا» باعىتىمەن قاتىنايتىن جۇردەك پويىزعا «اباي جولى» اتاۋى بەرىلدى. مۇنداي شەشىمگە شىعىس قازاقستان وبلىسى سەمەي قالاسى زيالى قاۋىمى وكىلدەرىنىڭ ۇسىنىسى نەگىز بولدى.

بۇل تۋرالى قازاقپارات «جولاۋشىلار تاسىمالى» ا ق باسپا ءسوز قىزمەتىنە سىلتەمە جاساپ حابارلايدى.

«بيىل مۇحتار اۋەزوۆتىڭ دۇنيەگە كەلگەنىنە 120 جىل تولادى. بۇل- ۇلى جازۋشىنىڭ ادەبي مۇراسىن ناسيحاتتاۋداعى ناقتى قادام. ءبىزدىڭ ۇسىنىسىمىزعا قولداۋ بىلدىرگەن ۇلتتىق تاسىمالداۋشى كومپانيا باسشىلىعىنا العىس ايتامىز»، - دەيدى باستاماشى توپتىڭ مۇشەسى، ابايدىڭ «جيدەباي- ءبورىلى» مەملەكەتتىك مۇراجاي- قورىنىڭ ديرەكتورى بولات جۇنىسبەكوۆ.

№67/68 «استانا- زاشيتا» جۇردەك جولاۋشىلار پويىزى وتاندىق «تۇلپار- تالگو» ۆاگوندارىمەن جاساقتالعان جانە كۇن سايىن جۇرەدى. جولداعى ۋاقىتى -16 ساعات 30 مينۋت.

قازىرگى كەزدە رەسپۋبليكالىق جانە مەملەكەت ارالىق باعىتتار بويىنشا «الاتاۋ»، «اقجايىق»، «جەتىسۋ»، «سارايشىق»، «اقسۇڭقار» جانە ت. ب. اتاۋلى پويىزدار قاتىنايدى.

اۆتور: مارلان جيەمباي