انتاركتيدانى باعىندىرعان قازاقتار ەكسپەديتسيا بارىسىندا قانداي قاۋىپتەرگە كەزدەسكەنىن ايتىپ بەردى - فوتو
«ءتۇرلى ساتتەر، سان الۋان پروبلەمالار بولدى. ءبىز ابايسىزدا پالاتكامىزدى دا ورتەپ الدىق. قيىندىقتار دا بولدى. دەگەنمەن ءبىز ولارعا دايىن ەدىك. ءبىز ۆينسون (انتاركتيدانىڭ ەڭ بيىك شىڭى) شىڭىنا شىققان كەزىمىزدە اۋا رايى وتە قولايسىز بولدى. جەلدىڭ جىلدامدىعى ساعاتىنا 25-30 شاقىرىمعا دەيىن جەتتى. سول جەردە 2 ساۋساعىمدى ءۇسىتىپ الدىم. ءىلياس تا (ەكسپەديتسيا مۇشەسى عالىمبەكوۆ) اياعىن ءۇسىتتى. ءبىراق، ءبىز وعان دايىن بولدىق»، - دەدى ساعىمبايەۆ ورتالىق كوممۋنيكاتسيالار قىزمەتىندەگى بريفينگ بارىسىندا.
ول قىزىقتى ساتتەردىڭ دە بولعانىن اتاپ ءوتتى. ماسەلەن، ساعىمبايەۆ ۆينسون شىڭىنا قازاقستان تاۋەلسىزدىگىنىڭ 25 -جىلدىق مەرەيتويى كۇنىندە مەملەكەتتىك تۋدى جەلبىرەتكەن ءسات ەكسپەديتسيا مۇشەلەرىنىڭ ماڭگى ەسىندە قالاتىندىعىن باسا ايتتى. ال، ءىلياس عالىمبەكوۆ بولسا 21 جاسقا تولعان تۋعان كۇنىن وڭتۇستىك پوليۋستە اتاپ وتكەن.
«ەكسپەديتسيامىزدىڭ ءاربىر مۇشەسى ءوز مىندەتتەرىن 100 پايىزعا ورىندادى. قيىن ساتتەردە ءبىر- بىرىمىزگە قولداۋ كورسەتتىك. جىلدار بويعى كاسىبي تاجىريبە- داعدىمىز دا كادەگە جارادى»، - دەدى ەكسپەديتسيا كاپيتانى.
ايتا كەتەيىك، «قازاق گەوگرافيالىق قوعامى» ەل تاۋەلسىزدىگىنىڭ 25 -جىلدىعىنا ارناپ وڭتۇستىك پوليۋسكە ەكىنشى قازاقستاندىق ەكسپەديتسيانى ۇيىمداستىرعان بولاتىن. وتكەن جىلدىڭ جەلتوقسان ايىنىڭ باسىندا وتكەن بۇل ەكسپەديتسيانىڭ قۇرامىنا الپينيستەر - ءىلياس عالىمبەكوۆ پەن يۋريي يۋشين، عالىمدار - ءاليا ەرنازاروۆا، ارمان بايمۇحامبەدوۆ جانە داۋلەت شارىپوۆتەر كىردى. قازاقستان رەسپۋبليكاسىنىڭ 25 -جىلدىعىنا ارنالعان «تاۋەلسىزدىك ءپوليۋسى» عىلىمي- زەرتتەۋ ەكسپەديتسياسىنىڭ توپ جەتەكشىسى ماعجان ساعىمبايەۆ بولدى. عالىمدار وڭتۇستىك پوليۋستە ەكولوگيا، بيولوگيا جانە ادام فيزيولوگياسى سالالارىندا زەرتتەۋ جۇمىستارىن جۇرگىزدى.
ۆينسون شىڭى وڭتۇستىك پوليۋستەن 1200 شاقىرىم جەردە ورنالاسقان جانە «7 summits» باعدارلاماسىنا كىرەدى. ەكسپەديتسيا قاتىسۋشىلارى وڭتۇستىك پوليۋسكە دەيىن 200 شاقىرىم جەردى شاڭعىمەن ءجۇرىپ ءوتتى.
ا
اۆتور: مارلان جيەمباي
