عابدۋلليننىڭ بيۋدجەتتىك قارجىنى الۋ ءۇشىن بوپسالاۋ ارەكەتىندەگى تەلەفون اڭگىمەلەرى جاريا ەتىلدى
بۇل جايىندا بۇگىن سوت تالقىلاۋى بارىسىندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى باعلان ىدىرىسوۆ ءمالىم ەتتى، دەپ حابارلايدى قازاقپارات. بۇگىنگى سوت پروتسەسى كەزىندە تاراپتار قىلمىستىق ءىس ماتەريالدارىمەن تانىستى. وتىرىس بارىسىندا سۋديا ىدىرىسوۆ عابدۋلليننىڭ شىعىس قازاقستان، جامبىل وبلىستىق جانە استانا قالالىق ىشكى ساياسات باسقارمالارى باسشىلارىمەن جانە ەنەرگەتيكا مينيسترلىگىنىڭ باسپا ءسوز حاتشىسىمەن تەلەفونمەن سويلەسكەن اڭگىمەلەرىنىڭ جازباشا نۇسقاسىن وقىپ بەردى. ماسەلەن، عابدۋللين جامبىل وبلىستىق ىشكى ساياسات باسقارماسىنىڭ باسشىسى راحيا تۇرماعانبەتوۆامەن تەلەفون ارقىلى سويلەسۋى بارىسىندا 2017 -جىلعا ارنالعان مەملەكەتتىك تاپسىرىس سوماسىن 10 ميلليون تەڭگەگە دەيىن ۇلعايتۋدى سۇرايدى.
اڭگىمەلەسۋ بارىسىندا تۇرماعانبەتوۆا جامبىل وبلىسى عابدۋللينگە باعىنىشتى بۇقارالىق اقپارات قۇرالدارىمەن جىل سايىن 2 ميلليون تەڭگەنىڭ مەملەكەتتىك تاپسىرىسى بويىنشا كەلىسىمشارت جاساساتىندىعىن اتاپ وتەدى. «ادەتتە ءبىز وبلىستارمەن 10 عا جۇمىس ىستەيمىز»، - دەيدى وعان جاۋاپ رەتىندە عابدۋللين. ەستەرىڭىزگە سالا كەتەيىك، وتكەن جىلدىڭ 16 -قاراشاسىندا استانا قالاسى الماتى اۋداندىق №2 -سوتىنىڭ سانكسياسىمەن بيگەلدى عابدۋللين تۇتقىنعا الىنعان بولاتىن. عابدۋللين «Central Asia Monitor» جانە «Radiotochka.kz» بۇقارالىق اقپارات قۇرالدارىنىڭ پايداسىنا بيۋدجەتتىك قارجىنى الۋ ءۇشىن بوپسالاۋ ارەكەتىنە باردى دەپ ايىپتالعان بولاتىن.
ول ءوز قۇزىرىنداعى بۇقارالىق اقپارات قۇرالدارىن پايدالانىپ، مەملەكەتتىك ورگان جەتەكشىلەرىنىڭ ىسكەرلىك ابىرويىنا نۇقسان كەلەتىن ماتەريالداردى جاريالاۋ ارقىلى ولارعا اقپاراتتىق شابۋىل جاساعان. الداعى ۋاقىتتا سىناۋدى توقتاتۋ ءۇشىن عادبۋللين لاۋازىمدى تۇلعالاردان ءوز مەديا رەسۋرستارىنا مەملەكەتتىك تاپسىرىستار تالاپ ەتكەن. ولار ءوز كەزەگىندە عابدۋليننىڭ كومپانياسىن قولپاشتاپ، مەملەكەتتىك ساتىپ الۋلار تۋرالى كەلىسىمشارتتار بەكىتۋدى قامتاماسىز ەتكەن. وسىدان كەيىن عانا ولاردىڭ قىزمەتى تۋرالى تەك جاعىمدى ماتەريالدار جاريالانىپ وتىرعان.
ماسەلەن، جامبىل وبلىسى اكىمدىگىنەن عابدۋللين 10 ميلليون تەڭگە كولەمىندەگى قاراجات بوپسالاعان. ءدال وسى سحەمامەن 7 مەملەكەتتىك ورگان عابدۋللينگە مەملەكەتتىك تاپسىرىس الىپ بەرگەن. 11 -قاڭتاردا وتكەن سوت وتىرىسى بارىسىندا بيگەلدى عابدۋلليننىڭ ادۆوكاتى امانجول مۇحامەدياروۆ ءوزىنىڭ قورعالۋشىسىنىڭ بارلىق كىناسىن مويىنداپ، كەلتىرگەن شىعىندى تولىق كولەمدە وتەگەندىگىن ەسكەرە وتىرىپ، قىلمىستىق قۋدالاۋدان بوساتۋدى سۇراعان ەدى.
