الماتى وبلىسىندا ءۇش اعايىندىنى ءولتىرىپ سوتتالعانداردىڭ اپەللياتسيالىق شاعىمى قارالادى

تالدىقورعان. قازاقپارات - الماتى وبلىسىندا ءۇش اعايىندىنى ازاپتاپ ولتىرگەن قىلمىسكەرلەردىڭ اپەللياتسيالىق شاعىمى قارالادى.

اتالعان پروتسەسس الماتى وبلىستىق سوتىندا وتەدى، دەپ حابارلايدى قازاقپارات ءتىلشىسى. الماتى وبلىستىق قىلمىستىق ىستەر جونىندەگى سوت القاسىندا ءىس 25 -قاڭتاردا قارالادى. ساعات 10:00 گە بەلگىلەندى. بۇعان دەيىن حابارلاعانىمىزداي، جارقىنبەك دولدان، مۇقيات زارلىحان مەن ءالىمحان قادىلبەكتەردى ولتىرگەن كۇدىكتىلەرگە قاتىستى سوت ۇكىمى قاراشانىڭ 29 ى كۇنى شىقتى. سوت باس كۇدىكتى تالعات سۇلەيمەنوۆتى ءومىر بويىنا باس بوستاندىعىنان ايىرۋ تۋرالى جازا تاعايىندادى. ال قىلمىسكەر مۇرات وڭالبايەۆ 25 جىلعا سوتتالدى. سونداي-اق اۋىر قىلمىسقا كۋاگەر بولا تۇرا ەشكىمگە حابارلاماعان باقىت بايقاسىموۆ 4 جىلعا باس بوستاندىعىنان ايىرىلدى.

ەستەرىڭىزگە سالا كەتەيىك، قاراساي اۋداندىق سوتىندا ءۇش اعايىندىنى ولتىرگەندەردىڭ ءىسى قارالدى. جابىرلەنۋشى تاراپ قىلمىسكەرلەردى ءولىم جازاسىنا كەسۋدى سۇراعان ەدى.

ايتا كەتەلىك، قىركۇيەك ايىندا ءۇش اعايىندى ۇزىناعاشقا مال ساتۋعا (40 ءىرى قارا مال) كەتىپ، ءىز-ءتۇزسىز جوعالىپ، ارتىنشا ولاردىڭ ءولى دەنەلەرى تابىلدى. قازا بولعاندار مۇقيات زارىلحان، جارقىنبەك دولدان جانە قادىلبەك ءالىمحاننىڭ ارتىندا ءۇش وتباسىدان 8 بالا جانە جارلارى قالدى.