قىدىرالى بولمانوۆ ءوزىن مازاق قىلعان كاريكاتۋرا اۆتورىن سوتقا بەرمەك

استانا. قازاقپارات - قىدىرالى بولمانوۆ ءوزىن مازاق قىلعان كاريكاتۋرا اۆتورى، سۋرەتشى مۇرات ءدىلمانوۆتى سوتقا بەرمەك.

تانىمال پروديۋسەر سۋرەتشىنىڭ ەل الدىندا وزىنەن كەشىرىم سۇراۋىن تالاپ ەتىپ وتىر.

بۇل تۋرالى Tengrinews.kz باسىلىمىنا بولمانوۆتىڭ وكىلى، زاڭگەر امانبول ابەۋوۆ حابارلاعان.

مۇرات ءدىلمانوۆ سالعان سۋرەتتە ەر ادام توسەكتىڭ شەتكى جاعىندا وتىر، ال ونىڭ جانىنداعى ايەل جالاڭاش كۇيدە تەرىس قاراپ جاتىر. بۇل رەتتە سۋرەتتەگى ادامنىڭ ءقىدىرالى بولمانوۆ ەكەنى ەش جەردە اتاپ كورسەتىلمەگەن. دەسە دە قورعاۋشى ابەۋوۆ سوت ارقىلى مورالدىق وتەماقى تالاپ ەتپەك.

«بۇل كاريكاتۋرا اۆتورىن سوتقا بەرۋگە نەگىز جەتەرلىك جانە ول وي قورلاۋ مانىندە جاسالعان. سۋرەتتەگى ادامنىڭ قىدىرالى ەكەنى ارنايى مامانداردىڭ كومەگىنە جۇگىنبەسەك تە تۇسىنىكتى. دەسە دە مەن اتالعان كاريكاتۋرانى ساراپشىلارعا جىبەردىم. سۋرەتتە قىدىرالىنىڭ ارتىندا ايەل ادام جاتىر. ءبىزدىڭ بولجاۋىمىز بويىنشا، ول قاراقات. بۇل دا ار- نامىسقا سىزات تۇسىرەتىن نارسە. بۇل جاعدايدا ولاردىڭ بالالارىنا مورالدىق تۇرعىدان اۋىر ءتيدى دەپ ايتا الامىز، ولاردىڭ انالارى جالاڭاش جاتىر. قاراقات ەمەس باسقا ايەل بولعان جاعدايدىڭ وزىندە اۆتور قىدىرالىنى اشىناسىمەن بىرگە بەينەلەپ وتىر. بۇل دەگەنىڭىز جەكە ومىرگە قول سۇعۋ. ءبىز سۋرەتشىدەن وسى سۋرەتتى جاريالاعان الاڭدا مۇنى جوققا شىعارۋدى جانە كەشىرىم سۇراۋىن تالاپ ەتەمىز. سونىمەن قاتار، وسى سۋرەتتى جەلىدە جاريالاعاندارعا سوتقا دەيىنگى شاعىم ءتۇسىردىم، كوبىسى ءوشىرىپ جاتىر»، - دەدى زاڭگەر.

الايدا پروديۋسەردىڭ قورعاۋشىسى مورالدىق وتەماقى رەتىندە قانشا اقشا تالاپ ەتەتىنىن ايتقان جوق. ونىڭ سوزىنە قاراعاندا، ول بىرنەشە فاكتورعا بايلانىستى بولادى.

ەگەر ماماندار كاريكاتۋرانى قورلاۋ دەپ دالەلدەسە، سونىمەن قاتار، سۋرەتتە قىدىرالى مەن ايەلى بەينەلەنگەنىن انىقتاسا، سوما ەسەلەپ كوبەيگەلى تۇر ەكەن. مۇنىمەن قاتار، شاعىمدا ساراپشىلاردى جالداۋعا جۇمسالعان قاراجات تا ەسەپكە الىنادى.

ابەۋوۆتىڭ ايتۋىنشا، كاريكاتۋرادا ق ر ازاماتتىق كودەكسىنىڭ 145-بابىن («وز بەينەسىنە قۇقىق») بۇزۋعا باعىتتالعان ارەكەت بار. سونداي- اق، كاريكاتۋراداعى ءمان- ماعىنا ق ر كونستيتۋتسياسىنىڭ 18-بابىن («اركىمنىڭ جەكە ومىرىنە قول سۇعىلماۋىنا، ءوزىنىڭ جانە وتباسىنىڭ قۇپياسى بولۋىنا، ار- نامىسى مەن ابىرويلى اتىنىڭ قورعالۋىنا قۇقىعى بار») بۇزادى دەلىنەدى.

قورعاۋشىسى قىدىرالى بولمانوۆتى بۇگىنگىنىڭ باتىرى ءارى اعارتۋشىسى سانايتىنىن تىلگە تيەك ەتتى. بۇل رەتتە ابەۋوۆ الدەبىرەۋلەردىڭ پروديۋسەردىڭ اتىن قارالاعىسى كەلەدى دەپ ەسەپتەيدى. ونىڭ پىكىرىنشە، ءدىلمانوۆ پروديۋسەردى جاعىمسىز قىرىنان كورسەتكەن.

«قىدىرالى مەن ونىڭ وتباسىمەن ۇزاق جىلداردان بەرى تانىس ادام رەتىندە ايتارىم بار. ول ءبىزدىڭ زامانىمىزدىڭ قاھارمانى. ونىڭ ارەكەتىنەن، جەكە باسىنان جانە مىنەزىنەن ءوز حالقىنا بەي-جاي قاراي المايتىن باتىر مەن اقىننىڭ، اعارتۋشىنىڭ بەلگىلەرىن كورەمىن. الەۋمەتتىك جەلىلەردە تاراپ كەتكەن كاريكاتۋراعا قاتىستى ءقىدىرالىنىڭ زاڭگەرى ءارى زاڭدى وكىلى رەتىندە اۆتورعا ايتارىم - ول ويلانباستان جانە اسىعىس قادام جاسادى ءارى وسى ارقىلى ق ر زاڭناماسىندا كورسەتىلگەن جاۋاپكەرشىلىككە تارتىلۋى مۇمكىن»، - دەپ اتاپ ءوتتى ابەۋوۆ.

قىدىرالى بولمانوۆتىڭ ءوزى سۋرەتشىمەن كەزدەسۋگە دايىن ءارى كەلىسسوز جۇرگىزگىسى كەلەتىنىن ايتتى.

ەسەسىنە كاريكاتۋراشى مۇرات ءدىلمانوۆتىڭ كەشىرىم سۇرايتىن ويى جوق.

«مەن سۋرەتتىڭ وزىنەن دە، ونىڭ ماتىنىنەن دە ار-نامىستى قورلايتىن دۇنيە كورىپ تۇرعان جوقپىن. زاڭدىق تۇرعىدان العاندا ول كەز كەلگەن نارسەگە قورلانا الادى، الايدا الدىمەن سۋرەتتەگى ادامنىڭ ءوزى ەكەنىن جانە مورالدىق تۇرعىدان زارداپ شەككەنىن دالەلدەۋى قاجەت. سوندىقتان ەگەر دە ول (قىدىرالى بولمانوۆ) قالدىرىلعان پىكىرلەر ەمەس، كاريكاتۋرانىڭ ءوزى ار- نامىسىنا سىزات ءتۇسىردى دەپ ەسەپتەسە، سوتتا دالەلدەسىن. ال مەنىڭ كەشىرىم سۇرايتىن ويىم جوق»، - دەپ پىكىر ءبىلدىردى كاريكاتۋرا اۆتورى.

ءسوز سوڭىندا ءدىلمانوۆ بولمانوۆتىڭ وكىلدەرى حابارلاسپاعانىن ايتىپ قالدى.