ۇلتتىق ەكونوميكا ءمينيسترى سۇلەيمەنوۆ حالىققا ادال قىزمەت ەتۋگە ۋادە ەتتى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسى بارىسىندا تىلشىلەردىڭ ساۋالىنا جاۋاپ بەرگەن ق ر ۇلتتىق ەكونوميكا ءمينيسترى تيمۋر سۇلەيمەنوۆ حالىق الدىندا ادال قىزمەت ەتۋگە ۋادە ەتتى، دەپ حابارلايدى قازاقپارات.

  سۇلەيمەنوۆ مينيستر بولىپ تاعايىندالعانىنا قۋانىشتى ەكەنىن جانە ۆەدومستۆونى باسقارۋ ءۇشىن ءوزىن تىم جاس دەپ ەسەپتەمەيتىنىن ايتا كەلە، ءوزى سياقتى 17 جىلدىق ەڭبەك تاجىريبەسى بار ماماندى جاستار ساناتىنا قوسۋ قيسىنسىز بولىپ تابىلاتىنىن جەتكىزدى.

 «بارلىعى ادامنىڭ وزىنە بايلانىستى. ءبىر جاعىنان الىپ قاراعاندا تاجىريبە دە، يدەيالاردىڭ جاسامپازدىعى بار. شامامەن وسى جاستاعى مينيسترلەردىڭ بارلىعى تاۋەلسىز قازاقستان جاعدايىندا تاربيەلەنىپ، شىڭدالدى»، - دەپ توقتالدى ول.

 سونىمەن قاتار تىلشىلەر جاڭا مينيستردەن ونىڭ الدىنداعى ەكى ۆەدومستۆو باسشىلارى لاۋازىمدارىنان جانجالمەن بوساتىلعانى قانشالىقتى الاڭداتانىن سۇرادى.

«وتە قيىن سۇراق. مەنىڭ ويىمشا، ساعان دەيىن كىم بولعانى ماڭىزدى ەمەس. قىزمەتتە جاقسى ءارى جاۋاپكەرشىلىكپەن جۇمىس ىستەۋ كەرەك. وسى ورايدا باسشىلىقتىڭ بەرگەن تاپسىرمالارىن ورىنداپ، قىزمەتكەرلەرگە، قوعامعا، ازاماتتارعا قاتىستى ادال بولعان ماڭىزدى. بۇل ۇستانىمداردى ورىنداعان جاعدايدا ماقساتتار جۇزەگە اسادى دەگەن ويدامىن»، - دەپ جاۋاپ قايىردى مينيستر.

 سونىمەن قاتار جۋرناليستەردىڭ «بۇرىنعى مينيسترلەر» وتىرعان كرەسلونى اۋىستىردىڭىز با؟» دەگەن ساۋالىنا سۇلەيمەنوۆ: «كرەسلونى اۋىستىرعانىم جوق»، - دەپ جاۋاپ بەردى.

 ەستەرىڭىزگە سالا كەتەيىك، 2016 -جىلعى جەلتوقساننىڭ اياعىنا قاراي ەلباسى نۇرسۇلتان نازاربايەۆتىڭ جارلىعىمەن تيمۋر مۇرات ۇلى سۇلەيمەنوۆ قازاقستان رەسپۋبليكاسىنىڭ ۇلتتىق ەكونوميكا ءمينيسترى بولىپ تاعايىندالدى.

 اۆتور: رۋسلان عابباسوۆ