اقان ساتايەۆ ساق پاتشايىمى تۇمار تۋرالى فيلم تۇسىرمەكشى

استانا. قازاقپارات - تانىمال رەجيسسەر اقان ساتايەۆ ساقتاردىڭ كوشباسشىسى - تۇمار حانشايىم تۋرالى تاريحي فيلمدى ءتۇسىرۋدى جوسپارلاپ ءجۇر، دەپ حابارلايدى قازاقپارات ءتىلشىسى.

 «ءيا، ءدال وسى كينونى تۇسىرۋگە ۇلكەن نيەت بار. ءبىز الەمدىك تاريحتى وزگەرتكەن تۇلعالار تۋرالى تاريحي فيلمدەردى ءتۇسىرۋىمىز كەرەك. وسىنى ءتيىستى دەڭگەيدە، حالىقارالىق دارەجەدە جاساي الاتىن بولساق، حالىقتىڭ كوڭىلىنەن شىعىپ قانا قويماي، فيلمگە كەتكەن شىعىندى دا تولىعىمەن اقتاي الامىز. ونداي كارتينالاردى تاياۋ شىعىس، امەريكا جانە تاعى باسقا ەلدەرگە حالىقارالىق پروكاتقا شىعارۋعا بولادى»، - دەدى ساتايەۆ قازاقپارات تىلشىسىنە بەرگەن سۇحباتىندا.

ونىڭ ايتۋىنشا، بۇگىندە فيلمنىڭ سينوپسيسى، ياعني سسەناريدىڭ قىسقارتىلعان نۇسقاسى دايىن. قارجى ماسەلەسى ءالى شەشىلمەگەن. دەگەنمەن، رەجيسسەر ءتۇسىرۋ جۇمىستارىن اعىمداعى جىلدان قالماي باستاۋعا نيەتتى.

 ايتا كەتەيىك، ساق پاتشايىمى تۇماردىڭ ەسىمى ەجەلگى جازبالاردا توميريس دەپ كورسەتىلگەن. ب. ز. د. 530-529 -جىلدارى ميديا ەلىنىڭ پاتشاسى كير كوپتەگەن ەلدەردى وزىنە باعىندىرىپ، «ازيا ءامىرشىسى» اتاعىنا يە بولىپ، ۇلى دالاعا قارسى جورىققا شىقتى. شايقاستاردىڭ بىرىندە كير پاتشاسى توميريستىڭ جۇبايى رۋستامدى ءولتىرىپ، تۇماردىڭ بالاسى سىپىردى قولعا تۇسىرگەن. تۇتقىندا توميريستىڭ ۇلى دا مەرت بولدى. ال كير كوشپەندىلەر ەلىنە ەلشى اتتاندىرىپ، ولاردىڭ حانشاسىنا وزىنە تۇرمىسقا شىعۋىن سۇرادى. سونىمەن بىرگە، ءبىر حالىققا بەيبىت جولمەن بىرىگۋ تۋرالى ۇسىنىس جاسادى.

 تۇمار كير پاتشاسىنىڭ ۇسىنىسىن قابىلداماي، ونىڭ قانعا تويماس باسىن قانعا تۇنشىقتىرۋدى ۋادە ەتەدى. اقىرى، سوزىنە تۇرعان پاتشايىم پارسىلارعا قارسى ۇرىس جۇرگىزىپ، جەڭىسكە جەتەدى. سول كەزدە تۇمار پارسىلاردىڭ پاتشاسى كيردىڭ باسىن شاۋىپ الىپ، قان تولتىرىلعان ساباعا تىعىپ: «اڭساعانىڭ قان ەدى، ءىش ەندى سونى!» - دەپ ايقايلادى. بۇل وقيعانى گرەك تاريحشىسى گەرودوت «ەڭ كەسكىلەسكەن جانە ۇلى شايقاس» دەپ سۋرەتتەگەن.

 اۆتور: ارمان اسقاروۆ