تاريحي فيلمدەگى نەگىزگى كەيىپكەرلەردىڭ ءرولى ماعان بۇيىرىپ كەلەدى - مۇحتار تىلەۋعازى
قىتايدا اكتەر مۇحتار تىلەۋعازى باستى رولدەردىڭ ءبىرىن ويناعان «جاۋجۇرەك اسپان ساردارى» فيلمى پروكاتقا شىققان كۇنى- اق 19 ميلليون دوللار قارجى جيناعانى حابارلاندى. بۇل فيلم - 40 جاستاعى قازاق اكتەر تۇسكەن 20 شاقتى تۋىندىنىڭ ءبىرى. مۇحتار تىلەۋعازى «ازاتتىققا» بەرگەن سۇحباتىندا بۇل فيلمدەگى ءرولى جايلى، كينو ونەرىنە قالاي كەلگەنى تۋرالى اڭگىمەلەدى.
- اكتەرلىك نەگىزگى ماماندىعىڭىز با؟
- بالالىق شاعىم وتكەن ىلە وبلىسى كۇنەس اۋدانىنداعى ورتا مەكتەپتى بىتىرگەننەن كەيىن بەيجىڭگە (پەكينگە - رەد. ) كەلىپ، قىتاي ونەركاسىپ ۋنيۆەرسيتەتىنىڭ ەكونوميكا فاكۋلتەتىندە ءتورت جىل ءبىلىم الدىم. ءبىراق ماماندىعىم بويىنشا ءبىر كۇن دە جۇمىس ىستەمەپپىن. ويتكەنى بالا جاسىمنان كينوعا تۇسۋگە قۇمار بولدىم. ورتا مەكتەپتە سپورتپەن، ونىڭ ىشىندە باسكەتبولمەن اينالىستىم. بويىم - 1 مەتر 87 سانتيمەتر. مەنىڭ كينوعا كەلۋىمە دە وسى بويىم اسەر ەتتى دەسەم بولادى.
- كينو سالاسىنا قالاي كەلدىڭىز؟
- 2010 -جىلى قىتايدىڭ تانىمال رەجيسسەرلەرىنىڭ ءبىرى لۋ چجان مەنى فيلمىنە شاقىرىپ، سوندا وينادىم. سول فيلمنەن كەيىن كينو سالاسىنداعى جولىم اشىلدى. سودان سوڭ ىلە- شالا بەلگىلى كينو مامان تيان جۋان جۋاننىڭ كوزىنە ءتۇستىم. ول فيلمىندە تاڭ پاتشالىعىنا قارسى شىققان تۇركىتەكتەس جاۋىنگەردىڭ ءرولىن بەردى. مىنە، وسىدان كەيىن تەك تاريحي فيلمدەرگە ءتۇسىپ كەلەمىن. سول تاريحي فيلمدەگى نەگىزگى كەيىپكەرلەردىڭ ءرولى ماعان بۇيىرىپ كەلەدى. ءتىپتى، بىردە قىتايدىڭ تانىمال رەجيسسەرلەرىنىڭ ءبىرى «سەنىڭ ءتۇرىڭ بۇرىنعىنىڭ ادامدارىنا كەلەدى» دەگەن. بەيجىڭدە قازاقتاردى كورمەگەن رەجيسسەرلەر دە كەزدەسەدى. كەيدە «سەن قاي ۇلتسىڭ؟ » دەپ سۇراپ جاتادى. ونداي كەزدە «قازاق دەگەن ۇلتتان بولامىن. قازاقستان دەگەن ەلدى ەستىپ پە ەدىڭىز؟ قازاق دەگەن حالىق نەگىزىندە سول جاقتا تۇرادى» دەپ تۇسىندىرەمىن.
- وسى ۋاقىتقا دەيىن قانشا فيلمگە ءتۇستىڭىز.
- ناقتى سانىن ايتا المايمىن. شامامەن 20-عا جۋىقتاپ قالدى. قازىر مەن تۇسكەن فيلمدەردىڭ ءبىرى «جاۋجۇرەك اسپان ساردارى» كينوسىن كورسەتىپ جاتىر. بۇل فيلمدى 2014 -جىلى تۇسىرگەن. قازىر تەك قىتايدا عانا ەمەس، الەمنىڭ 30 عا جۋىق ەلىندە كورسەتىلىپ جاتىر دەپ ەستىدىم. بۇل فيلمدە بايرۇڭ تايپاسى وكىلىنىڭ ءرولىن سومدادىم. ال 2016 - جىلى ءتورت فيلمگە ءتۇستىم، ءبىراق ولاردى ءالى جارىققا شىعارعان جوق.
- كينوعا تۇسۋدەن بوس كەزدە نەمەن اينالىساسىز؟
- كەلىنشەگىم انار ءوزىم تۋىپ- وسكەن اۋماقتا ۇكىمەتتىك قىزمەتتە ىستەيدى. سول سەبەپتى كينو تۇسىرىلىمىنەن بوس ۋاقىتتارى تۋعان جەرىمدە بولامىن. قولىم بوس كەزدەرى كىتاپ وقيمىن، سپورتپەن شۇعىلدانىپ، دەنەمنىڭ بۇلشىق ەتتەرىن جەتىلدىرەمىن، ات ۇستىندە ءجۇرىپ ءتۇرلى ونەر جاساۋعا جاتتىعامىن. سەبەبى كينوداعى نەگىزگى كەيىپكەرلەرىم ات ۇستىندە بولادى. ال كينو ءتۇسىرۋ كەزىندە بالا- شاعامدى الىپ، بەيجىڭگە كوشىپ بارامىن. كوشپەلى قازاقپىن دەسەم دە بولادى.
- سۇحباتىڭىزعا راحمەت.
نۇرتاي لاحان ۇلى
www.azattyq.org/ l 
