توقتار سەرىكوۆتى «كورشىنىڭ قىزىن» ايتپاعانى ءۇشىن قاريا بالاعاتتاپ كەتكەن

وعان سەبەپ ءانشى كوپشىلىك ءسۇيىپ تىڭدايتىن «كورشىنىڭ قىزى» ءانىن ورىنداماي قويعان، دەپ حابارلايدى Stan.kz.
جۋىردا عانا ەسەپ بەرۋ كەشىن وتكىزگەن توقتار سەرىكوۆ كەش بارىسىندا باسىنان وتكەرگەن قىزىقتى وقيعاسىمەن ءبولىستى.
ايتۋىنشا، 7-8 جىلداي ۋاقىت بۇرىن قاراعاندى ءوڭىرىنىڭ اقساقالى «كورشىنىڭ قىزى» ءانىن ايتپاي قويعانى ءۇشىن ءانشىنى بالاعاتتاپ كەتكەن.
«ءار ءانشىنىڭ ءوزىنىڭ سۇيىكتى اندەرى بولادى. مىسالى مەنىڭ اندەرىمنىڭ ءبارىن حالىق جاقسى كورەدى، بىلەمىن. ءبىراق كەيدە ۋاقىت جەتپەيدى. ءبىرىن ايتىپ، ءبىرىن ايتپاي جاتامىز. كەش بولعان سوڭ جاڭا اندەردى ورىنداعىمىز كەلەدى. وسىدان 7-8 جىل بۇرىن قاراعاندى دەيتىن قاسيەتتى وڭىردە ۇلكەن سيركتە كونسەرت بەردىك. سيركتى بىلەسىزدەر دوڭگەلەك، حالىقتىڭ ءبارى ۇستىڭە ءمىنىپ تۇرادى. نە ايتىپ تۇرعاندارىن ءبارىن ءبىلىپ تۇراسىڭ. انا جەردە راحات، سىبىرلاپ تۇرعانىن ەستيسىڭ. «بويى بىرتىق ەكەن» دەيدى. بىرەۋ ماقتاپ جاتادى، قۇلاپ ءتۇرىپ قوياسىڭ. ءانشى بولعان سوڭ جاقسى كورەسىڭ عوي. سەنىڭ تاراپىڭا ايتىپ جاتقانى جاقسى.
سونداي ءبىر كەزەكتى كونسەرتتە كەش اياقتالىپ، 2.5 ساعات تەرلەپ- تەپشىپ، دىمىم قالماي ءانىمدى ايتىپ قوشتاسىپ تۇرسام، قاراعاندىدا ءبىر اقساقال «اكەڭنىڭ اۋزى» دەپ بوقتاپ كەتىپ بارادى (ار جاعىن ايتپاي- اق قويايىن). مەن تاڭعالدىم. ول كىسىنىڭ الدىندا 2.5 ساعات دىمىم قالماي، تەرلەپ- تەپشىپ ولەڭ ايتتىم. جازىعىم ولەڭ ايتقانىم، انا كىسى مەنى بوقتاپ بارادى. ونى قاسىندا تۇرعاندار ەستىپ تۇر. الگى كىسىنىڭ قولىنان شاپ بەردىم.
«اقساقال، توقتاي تۇرىڭىزشى! ءسىز مەنى بوقتاپ بارا جاتىرسىز با؟» دەسەم «ءيا» دەپ جاسىرمايدى. ايىپتى بولسام، ەلدىڭ الدىندا كەشىرىم سۇرايىن. جىرتىڭداپ بيلەگەنىم ۇناماي قالعان شىعار دەسەم، بەتىمە قاراپ تۇرىپ: «اتاڭنىڭ بالاسى، «كورشىنىڭ قىزىن» نەگە ايتپايسىڭ؟» - دەيدى. سويتسەم جازىعىم سول ەكەن. اتامدى توقتاتىپ قويىپ، «كورشىنىڭ قىزىن» ايتىپ بەردىم»، - دەگەن ءانشى كونسەرتكە كەلگەن تىڭدارماندارىن كۇلكىگە قارىق قىلدى.