قازاق سىن ايتپاسا، قازاق بولا ما - «الماس قىلىش» فيلمىنىڭ رەجيسسەرى

استانا. قازاقپارات - ۇكىمەتتىڭ بۇگىنگى وتىرىسىندا ءسوز العان «قازاق حاندىعى. الماس قىلىش» فيلمىنىڭ رەجيسسەرى رۇستەم ءابدىراش اتالعان كينوتۋىندىنى ءتۇسىرۋ كەزىندەگى قيىنشىلىقتار تۋرالى ايتىپ بەردى، دەپ حابارلايدى قازاقپارات ءتىلشىسى.
None
None

 «تاريحي فيلمدەردى تۇسىرگەندە قارۋ- جاراق جەتىسپەي جاتادى، وق جەتىسپەي جاتادى. سونىڭ ءبارى اينالىپ كەلگەندە قاراجاتقا تىرەلەدى. ءبىراق ەل اعالارىنىڭ ارقاسىندا وسى فيلمدى ءبىتىرىپ، ۇيالمايتىنداي ەتىپ جاساپ شىقتىق دەپ ويلايمىن. رەتى كەلگەسىن ايتىپ قويايىن، سول كەزدەگى قورعانىس ءمينيسترى يمانعالي نۇرعالي ۇلىنا مىڭ دا ءبىر راقمەت. وسى جوباعا كوپ كومەگىن تيگىزدى. قاپشاعايدا ءتۇسىرۋ توبىنىڭ جاتاتىن ورنىن بەرىپ، «ەگەرسكي پولك» جىبەردى، ات جاعىنان ۇلكەن كومەك بولدى. سونداي- اق الماتى اكىمى باۋىرجان بايبەك تە ءوزى كەلىپ، كاسىپكەرلەردى تاۋىپ، فيلمنىڭ اياعىنا دەيىن تۇسىرىلۋىنە قولعابىس جاسادى. ءسويتىپ، ەل اعالارى ارقاسىندا وسى ۇلكەن جوبانى اياقتاپ شىقتىق»، - دەدى ءابدىراش.

ونىڭ ايتۋىنشا، بۇگىندە حالىق تاراپىنان «قازاق حاندىعى. الماس قىلىش» فيلمىنە وڭ باعا بەرىپ جاتقاندار كوپ. الايدا سىن ايتاتىندار دا بار. «ەندى، سىن ايتپاسا، ءبىزدىڭ قازاق قازاق بولا ما؟ كەزىندە «قىز جىبەك» شىققاندا دا ءبىراز سىن ايتىلدى. ءبىراق ءبارىبىر ول ءوز ورنىن تاپتى. ءبىزدىڭ جوبامىز دا ءوز ورنىن تابادى دەگەن ويدايمىز. بۇگىندە ەلدەن سۇراۋ ءتۇسىپ جاتىر. بيىل فيلمنىڭ جالعاسىن تۇسىرەتىن ويىمىز بار. سوندىقتان سىزدەر، ەل اعالارى قولداپ، وسى جولى دۇرىس بيۋدجەت بەرىڭىزدەرشى. ويتكەنى قينالىپ جۇمىس ىستەيسىڭ. اياعىڭا تارتساڭ، باسقا جەتپەيدى. باسىڭا تارتساڭ، اياققا جەتپەيدى. ەندى، بۇل ءوزىمنىڭ اكەم تۋرالى فيلم ەمەس. ول - بۇكىل حالقىمىزدىڭ تاريحى. وسى جەردە وتىرعان بارلىق ازاماتتاردىڭ تاريحى. سوندىقتان بۇل جوبانى جالعاستىرىپ، كەلەسى جىلى پاش ەتسەك، دۇرىس بولار ەدى»، - دەپ اتاپ كورسەتتى رەجيسسەر.

 اۆتور: ارمان اسقاروۆ

سوڭعى جاڭالىقتار