ۋنيۆەرسيادادا جاراقات العان سپورتشى اۋرۋحاناعا تىكۇشاقپەن جەتكىزىلەدى

بۇل تۋرالى بۇگىن ق ر ۇكىمەتىنىڭ سەلەكتورلىق رەجىمدەگى وتىرىسىندا ەلىمىزدىڭ دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.
«ۋنيۆەرسيادانى وتكىزۋ اياسىندا مينيسترلىك الماتى قالاسىنىڭ اكىمشىلىگىمەن بىرلەسىپ، قاتىسۋشىلارعا شارا بارىسىندا جانە توقتاعان ورنىندا ۋاقىتىندا جانە ساپالى مەديتسينالىق كومەك كورسەتۋ ماسەلەسىن پىسىقتادى. جالپى مەديتسينالىق كومەك كورسەتۋ ستاتسيونارلىق تۇردە، جەدەل جاردەم تۇرىندە كورسەتىلەدى. سونىمەن قاتار مەديتسينالىق پۋنكت قىزمەتتەرى ۇيىمداستىرىلادى. بۇگىنگى تاڭدا قاجەتتى دايارلىق تولىق اياقتالدى دەسەك بولادى»، - دەدى مينيستر.
دۇيسەنوۆانىڭ ايتۋىنشا، قاجەتتى مەديتسينالىق قۇرال- جابدىقپەن جانە ءدارى- دارمەكپەن قامتاماسىز ەتىلگەن كەزەكشى جەدەل مەديتسينالىق كومەك بريگاداسى بارلىق 9 سپورت نىسانىندا دا جۇمىس ىستەيتىن بولادى. 215 جەدەل جاردەم كولىگى شۇعىل، دەرەۋ جانە قاجەتتى مەديتسينالىق كومەك كورسەتۋگە دايىن تۇرادى. مۇنان بولەك، 40 سانيتارلىق اۆتوكولىك سپورتتىق جانە سپورتتىق ەمەس نىسانداردا كەزەكشىلىك جاسايدى.
«№4 جانە №7 قالالىق كلينيكالىق اۋرۋحانالاردىڭ بازاسىندا تىكۇشاق قوناتىن الاڭدار سالىندى. بۇل قاجەت بولعان جاعدايدا پاتسيەنتتى دەر ۋاقىتىندا جەتكىزىپ، ارنايى مامانداندىرىلعان كومەك كورسەتۋگە سەپتىگىن تيگىزەدى. 149 مەديتسينا قىزمەتكەرى، ونىڭ ىشىندە گەرمانيا ماماندارى تارتىلعان بازادا وقىتىلعان قۇتقارۋ قىزمەتىنىڭ 11 دارىگەرى جۇمىس ىستەيدى. جەدەل مەديتسينالىق كومەككە جۇمىلدىرىلعان مامانداردىڭ بارلىعى دا اعىلشىن ءتىلىن ءبىلىن بىلەدى»، - دەدى ول.
اۆتور: مارلان جيەمباي