قىمىز داڭقى قيانعا كەتسە

استانا. قازاقپارت - قىمىز بەن شۇبات قازاقتىڭ باعزى زاماننان كەلە جاتقان شيپالى سۋسىنى. ەندى ەلىمىز ۇلتتىق سۋسىندى كورشى ماسكەۋگە ەكسپورتتاماقشى.
None
None

 وتاندىق ءونىمدى سىرت ەلگە جەتكىزۋدى «ەۆرازيا ينۆەست لتد» ج ش س قولعا العان.

كومپانيا ديرەكتورىنىڭ ورىنباسارى عالىمجان مەيرامبەكوۆتىڭ ايتۋىنشا، ءوندىرىس ورنى رەسەيگە بيەنىڭ ءسۇتىن قۇرعاق ۇنتاق كۇيىندە تاسىمالداۋدى باستاپ كەتكەن. «ماسكەۋگە اقپاننان باستاپ ەكسپورتتايمىز. بۇل قالادا ءونىمدى ساۋدالايتىن سەرىكتەسىمىز بار. ايىنا جارتى توننا جونەلتۋدى جوسپارلادىق، كەيىننەن كولەمىن ارتتىرامىز» دەيدى ول. ودان باسقا بيە ءسۇتىن قىتاي مەن ەۋروپاعا ەكسپورتتاۋ بويىنشا دا كەلىسسوزدەر جۇرگىزىلىپ جاتىر. قازىرگى كەزدە كاسىپورىن ونىمدەرىن استانا مەن الماتىدا شىعارۋدا.

جالپى، ەۋروپادا وسى تەكتەس قۇرعاق ءسۇت ءونىمىن 30 عا تارتا كومپانيا وندىرەدى. «ءبىز گەرمانياداعى زەرتحاناعا ءونىمدى تەكسەرتتىك. كەيبىر كورسەتكىشتەر بويىنشا ءونىمىمىزدىڭ ساپاسى ەۋروپانىكىنەن اسىپ ءتۇستى. مۇنىڭ سەبەبى، ءبىزدىڭ جىلقىلار تابيعي جايىلىمدا جۇرەدى، ءتۇرلى شوپتەسىن وسىمدىكتەرمەن قورەكتەنەدى» دەيدى عالىمجان مەيرامبەكوۆ. ونىڭ ايتۋىنشا، ەۋروپالىقتار جىلقى ءسۇتىن كوسمەتيكا سالاسىندا كەڭىنەن پايلانادى. وسىعان وراي، بولاشاقتا قۇرعاق سۇتتەن كوسمەتيكا ءوندىرۋدى دە جوسپارلاپ وتىر.

راسىمەن، قاسيەتتى جانۋار ساناتىنداعى جىلقى مەن ويسىلقارا ءسۇتىنىڭ پايداسى مول- اق. مۇنى ۇلتتىق برەندكە اينالدىرۋ قاجەتتىگى دە ايتىلعان بولاتىن. ەكى جىل بۇرىن دەپۋتات قۋانىش ايتاحانوۆ: «قىمىز بەن شۇباتتىڭ ستاندارتتارىن بەلگىلەۋ كەرەك. ويتكەنى ستاندارت ءار جەردە ءارتۇرلى. ناعىز قىمىز بەن ناعىز شۇباتتىڭ ءوز ستاندارتى، حيميالىق قۇرامى بولۋ كەرەك. سوندىقتان بۇل جۇمىسقا عىلىمي- زەرتتەۋ ينستيتۋتتارى ارالاسىپ جاتىر. الداعى ۋاقىتتا قىمىز بەن شۇباتتىڭ ستاندارتتارى بەكىتىلىپ، بارلىق جەردە ستاندارت تەكسەرىلىپ وتىرادى. وسىلايشا، قىمىز بەن شۇبات «ەكسپو - 2017» كورمەسىنە وراي، ەلىمىزگە كەلەتىن ميلليونداعان تۋريستىڭ ەڭ ءدامدى تاماعىنا اينالىپ كەتۋى كەرەك» دەگەن دە بولاتىن.

وسى تۇرعىدا وڭتۇستىك قازاقستان وبلىسىندا 25 مىڭ تونناعا دەيىن ءسۇت وڭدەيتىن ۇلكەن زاۋىت سالىناتىنى حابارلانعان ەدى. قازىر تۇركىستاندا جىلىنا 33 مىڭ توننا قىمىز بەن شۇبات وڭدەيتىن زاۋىتتىڭ ىرگەتاسى قالانىپ وتىر. بۇل جوبا ەلباسىنىڭ «100 ناقتى قادام» ۇلت جوسپارىنىڭ 60 قادامىندا ءسۇت جانە ءسۇت ونىمدەرى ءوندىرىسىن دامىتۋ ءۇشىن ينۆەستورلار تارتۋ مىندەتىن ىسكە اسىرۋ اياسىندا قولعا الىنعان. وبلىستىق اكىمدىكتىڭ ءباسپاسوز قىزمەتىنىڭ حابارلاۋىنشا، وڭىردەگى ءسۇتتى دايىنداۋ جونىندە اۋىل شارۋاشىلىق كووپەراتسيانى دامىتۋعا سەرپىن بەرەتىن زاۋىتتىڭ جالپى قۇنى 7 ميلليارد 456,5 ميلليون تەڭگە. زاۋىت تولىق قۋاتتىلىعىنا ەنگەندە تاۋلىگىنە 100 توننا تۇيە جانە جىلقى ءسۇتىن قايتا وڭدەپ، وسى ءونىمنىڭ ۇنتاعىن شىعارادى. ءوندىرىس ورنىنىڭ جىلىنا 33 مىڭ توننا ءسۇتتى وڭدەۋگە مۇمكىندىگى بار.

جوبا بويىنشا العاشقى كەزەڭدە 170 ادام جۇمىسپەن قامتىلماق. ۇلت جوسپارىندا سونىمەن قاتار « ءۇش جىلدا ت م د ەلدەرى نارىعىنا شىعارىلاتىن ونىمدەرىنىڭ جارتىسىنا دەيىنگى ەكسپورتىن قامتاماسىز ەتۋ» جايى دا ايتىلعان. و ق و اكىمى جانسەيىت تۇيمەبايەۆ تاياۋدا اتالعان جوباعا قارجى سالاتىن Golden Cemal Group LTD كومپانياسىنىڭ قۇرىلتايشىسى ياڭ تسيمەن كەزدەسىپ، ماڭىزدى جوسپاردى تالقىعا سالدى. ينۆەستورلارمەن كەلىسىم جۇرگىزىپ، وندىرەتىن ونىمدەرى ۇلكەن سۇرانىسقا يە بولا الاتىن زاۋىتتىڭ قۇرىلىسىن باستاۋ جونىندە ورتاق شەشىمگە كەلدى. جەرگىلىكتى اتقارۋشى ورگان تاراپىنان كاسىپورىنعا 5,5 گا جەر تەلىمى ءبولىنىپ، مەملەكەت ەسەبىنەن ينفراقۇرىلىمىن جەتكىزۋ جوسپارلانعان. الداعى ۋاقىتتا كومپانيا باسشىلىعى وسىندا تۇيە جانە جىلقى شارۋاشىلىعىمەن اينالىسۋدى دا كوزدەپ وتىر.

 

 نۇراي راحىم

«ايقىن»

سوڭعى جاڭالىقتار